Májiliste azyq-túlik ónimderiniń baǵasyn retteý máseleleri talqylandy
ASTANA. 11 jeltoqsan. QazAqparat -Búgin Parlament Májilisinde Áleýmettik mádenı-damý komıtetiniń tóraıymy Darıǵa Nazarbaevanyń jetekshiligimen keńeıtilgen otyrys ótti.
Onda elimizdegi azyq-túlik ónimderiniń baǵasyn retteý máseleleri talqylandy.
Toqtala ketetin jaıt, buǵan deıin óńirlerdi aralap, saılaýshylarmen júzdesý barysynda depýtattarǵa negizgi azyq-túlik ónimderi baǵasynyń únemi ósetini jaıynda jurtshylyq tarapynan úlken alańdaýshylyq bildirilgen bolatyn. Sondyqtan da, halyq qalaýlylary azyq-túlik qaýipsizdigi, ónimderdiń sapasy men qoljetimdigi el turǵyndarynyń densaýlyǵy men ál-aýqatynyń jaqsarýyna tikeleı áser etetinin, qorytyndysynda osy máseleler der kezinde sheshimin tappasa, qoǵamda áleýmettik shıelenis týǵyzýy múmkin ekendigine nazar aýdaryp, arnaıy taldaýlar jasaǵan.
Osyǵan oraı, komıtet otyrysynda depýtat Ýálıhan Bıshimbaev azyq-túlik taýarlarynyń baǵasyna, onyń ishinde nan-toqash ónimderi, et jáne sút ónimderi, jemis-jıdek pen kókónis salasyndaǵy jaǵdaılarǵa taldaýdy jarııa etti. «Qalyptasqan ereje boıynsha memlekettiń ishki azyq-túlik qaýipsizdigi qamtamasyz etilýi úshin tutynylatyn taýarlardyń 80 paıyzy sol elde shyǵarylýy shart. Nemese memleket belgili bir azyq-túliktiń túrine mamandanyp, onyń eksporty syrtqy saýda balansynda oń saldoǵa jaǵdaı týǵyzýy kerek», - deıdi Ý. Bıshimbaev.
Onyń aıtýynsha, azyq-túlik qaýipsizdigi negizi úsh komponentten turady. Bular - jeke qoljetimdilik, ekonomıkalyq qoljetimdilik jáne ónim sapasy.
Jıyn barysynda jaýapty mınıstrlik ókilderi azyq-túlik baǵasyna qatysty baıandama jasap, aldaǵy josparlaryn ortaǵa saldy. Sondaı-aq, memlekettik organ ókilderi depýtattardyń kótergen saýalyna jaýap berdi.
