Májiliste avtobýs tasymaly salasyndaǵy máseleler kóterildi
NUR-SULTAN. QazAqparat – Májilis depýtat Serik Erýbaev «Aq jol» demokratııalyq partııasynyń fraktsııasy atynan jarııalaǵan depýtattyq saýalynda elimizdiń avtobýs tasymaly salasyndaǵy kúrdeli jaǵdaıdy kóterdi.
Osy oraıda Premer-Mınıstriniń orynbasary Roman Sklıardyń atyna saýal joldady, dep habarlaıdy QazAqparat tilshisi.
«Bul depýatattyq saýalǵa «Aq jol» demokratııalyq partııasyna elimizdiń avtobýs tasymaly salasyndaǵy kásip ıelerinenen kelip túsken kóptegen aryz-shaǵymdar túrtki boldy. Búkil álemde qoǵamdyq kólik shyǵyndy sala bolyp tabylatyny bárimizge belgili. Bul salaǵa memleket eriksiz shyǵyndardy jabý kepildigimen, jeke tasymaldaýshylardy tartady. Qazaqstanda turaqty qalalyq, qala mańyndaǵy jáne aýyldyq marshrýttarǵa qyzmet kórsetý kezinde kásiporyn shyǵyndaryn bıýdjet qarajatynan sýbsıdııalaý mindeti «Kólik týraly» jáne «Avtomobıl kóligi týraly» zańdar, sondaı-aq birqatar normatıvtik quqyqtyq aktilerdiń normalaryna sáıkes, jergilikti atqarýshy organdarǵa júktelgen. Alaıda, táýelsizdiktiń barlyq jyldarynda zańnama talaptary, jalǵyz-jarym erekshelikterdi qospaǵanda, bul salada tolyq oryndalmaǵan, sýbsıdııalaý júzege asyrylmaǵan», - dedi depýtat Májilistiń jalpy otyrysynda.
Onyń aıtýynsha, bul turǵyda turaqty avtobýs tasymaldary múshkil jaǵdaıda, kópshilik jeke avtoparkter bankrotqa ushyraý aldynda tur.
«Joǵaryda atalǵan jáıitti túsine otyryp, Úkimet 2018 jyly «Avtobýs tasymaldaryn damytý jóninde keshendi baǵdarlama» qabyldady, onda tasymaldardy tolyq kólemde sýbsıdııalaý, avtobýs parkin jańartý, elektrondyq bıletteý júıesin engizý, zańsyz tasymaldaýshylarǵa qarsy kúres jónindegi sharalar qamtylǵan. Áleýmettik mańyzy bar salany sýbsıdııalaý 2019 jyly ǵana bastaldy. 2020 jyldyń ózinde keıbir oblystarda 2021-2023 jyldarǵa arnalǵan bıýdjetti bekitý kezinde sýbsıdııalaýǵa arnalǵan shyǵystar qarastyrylmaǵan», - dedi Serik Erýbaev.
Onyń sózine qaraǵanda, birqatar óńirlerde memlekettik organdar maqsatty túrde jeke avtoparkterdi yǵystyryp, «Shymkent Bas», «Aqjaıyq avtoparki» sııaqty kvazımemlekettik kásiporyndar qurýda.
Biraq mundaı jaǵdaıdyń ózinde de bul mekemelerdiń sharýashylyq qyzmetine aralasyp, sýbsıdııalar tóleý jónindegi óz mindettemelerin oryndamaı otyr.
«Osyǵan baılanysty «Aq jol» Demokratııalyq partııasynyń fraktsııasy avtobýs tasymalyndaǵy kúrdeli jaǵdaıdy saýyqtyrý, sonyń ishinde jumys istep turǵan avtoparkterge tıesili sýbsıdııalardy tóleý jóninde shuǵyl sharalardy qabyldaýdy suraıdy», - dedi depýtat.
