Májiliste aýyldardy keń jolaqty ınternetke qosýdyń jospary baıandaldy
«Qazirgi kezde elimizde 117 qala men 3 324 aýylda keń jolaqty ınternet qoljetimdi. Ol ártúrli tehnologııalarmen qamtamasyz etilgen, solardyń ishinde talshyqty-optıkalyq jeli, 3G jáne 4G jelileri. 2018 jyly Qazaqstan álemdik reıtıngte uıaly baılanys abonentteri boıynsha 21-orynǵa ıe boldy. Qazaqstanda ınternet paıdalanýshylar sany 2018 jyly 81,3 paıyzdy qurady jáne álemdik reıtıngte Qazaqstan 45-orynǵa ıe boldy. Aýyldyq jerlerdi keń jolaqty ınternetpen ary qaraı qamtý úshin 2018-2022 jyldarda talshyqty-optıkalyq jáne LTE (4G) jelilerin salý josparlanýda», - dedi A. Jumaǵalıev.
Atap aıtqanda, birinshi kezeń talshyqty-optıkalyq jelilerdi salýǵa negizdelgen. Jobany iske asyrý 1 250 aýyldyq eldi mekende joǵary jyldamdyqty ınternet qyzmetterin usynýǵa múmkindik beredi. 2019 jylǵy birinshi jartyjyldyqtaǵy jaǵdaıy boıynsha talshyqty-optıkalyq jeliler 83 aýyldyq eldi mekende (onyń ishinde 85 densaýlyq saqtaý jáne 76 bilim nysany) iske qosyldy. 2019 jyldyń aıaǵyna deıin 685 aýyl ınternet jelisine qosylady, al 2020 jyly qalǵan 509 aýyldy qosý josparlanýda.
Ekinshi kezeń barysynda 2020-2022 jyldarda LTE (4G) standartyndaǵy mobıldi jelilerdi jáne basqa tehnologııalardy damytý arqyly 3 143 aýyldy ınternetpen qamtý josparlanýda.
Osy atalǵan jobalardy iske asyrý aıasynda 2020 jyldyń aıaǵyna deıin turǵyndardyń sany 250 –den asatyn 880 aýyl keń jolaqty ınternet jelisimen qamtylatyn bolady.
«Sonymen qatar, ary qaraı turǵyndardyń sany 50-den joǵary 885 aýyldy ınternet jelisine qosý josparlanýda. Qorytyndysy boıynsha. 2022 jyldyń sońyna deıin 5089 aýyldyq eldi meken ınternet jelisine qosylady. Al qalǵan aýyldarǵa spýtnıktik baılanys arqyly Internet jelisin uıymdastyrýdyń tehnıkalyq múmkindigi qamtamasyz etiledi. Bul oraıda aýyldyq eldi mekenderdi ınternet jelisine qosý Ulttyq ekonomıka mınıstrligimen jasalǵan perspektıvti aýyldar tizimine sáıkes oryndalatyn bolady», - dep naqtylady Asqar Jumaǵalıev.
Belgili bolǵandaı, joǵaryda atalǵan jobalardy oryndaý jumystarynyń nátıjesi boıynsha 2022 jyldyń sońyna deıin Qazaqstan Respýblıkasy halqynyń 97 paıyzy keń jolaqty ınternet jelisimen qamtylatyn bolady. Qalǵan 3 paıyzyna spýtnıktik tehnologııany qoldaný múmkindigi qamtamasyz etiledi.