Májiliste aýyl sharýashylyǵy mamandyqtaryna qatysty usynystar aıtyldy

«Búginde veterınarlyq mamandardyń tapshylyǵy sezilip otyr. Jumys isteıtin mamandardyń jalpy sany 10 798 adam, qosymsha kadrlarǵa qajettilik – 810 adam. Bul rette, 2021 jylǵy 1283 túlektiń ishinen mamandyq boıynsha 712 adam ǵana jumysqa ornalastyryldy. Sonymen qatar, kadrlardy daıarlaý týraly aıtqanda, birinshi kezekte veterınarııalyq mamandardy daıarlaıtyn joǵary oqý oryndaryna qoıylatyn talaptar tizbesin ázirleý kerek. Óıtkeni qazirgi ýaqytta olardy daıarlaýdy, onyń ishinde qajetti materıaldyq-tehnıkalyq jaraqtandyrylmaǵan joǵary oqý oryndary júzege asyrady, ǵylymı-pedagogıkalyq kadrlardyń biliktiligi de kóp nárseni qajet etedi. Budan basqa, bilim berý baǵdarlamalaryn, onyń ishinde arnaıy pánder sanyn ulǵaıtý arqyly ózektendirý talap etiledi», - dedi E. Barlybaev.

Onyń paıymynsha, oqytýshylardyń ǵylymı jáne óndiristik uıymdar bazasynda oqytylatyn pánderdiń ereksheligi boıynsha keminde bir jyl merzimge mindetti taǵylymdamadan ótýin turaqty negizde uıymdastyrý jóninde sharalar qabyldaý qajet.

«Mınıstrlik usynǵan veterınarııalyq mamandyqtarǵa aýyldyq kvotany 70% - ǵa deıin ulǵaıtý sharasynan basqa, bizdiń oıymyzsha, aýyl jastary úshin joǵary oqý oryndaryna granttarǵa túsý kezinde barlyq aýyl sharýashylyǵy, onyń ishinde veterınarııalyq mamandyqtar úshin ótý balyn azaıtý jaǵyna qaraı qaıta qaraý qajet. Jas mamandardy aýylda bekitýdiń mańyzdy elementi olardy oqytý protsesine aýyl sharýashylyǵy taýar óndirýshilerin tartý bolýy múmkin. Budan basqa, iri agroqurylymdar bazasynda stýdentterdiń óndiristik praktıkadan ótýin turaqty negizde engizýge bolady», - dedi depýtat.

Budan buryn habarlanǵandaı, Bilim jáne ǵylym mınıstrligine veterınarlyq mamandyqtar boıynsha aýyldyq kvotany búgingi 30%-dan 70%-ǵa deıin ulǵaıtý jóninde usynys engizildi.