Májiliste aýdıtorlyq qyzmetke qatysty zań jobasy tanystyryldy
NUR-SULTAN. QazAqparat – Parlament Májilisinde Qazaqstan Respýblıkasynyń keıbir zańnamalyq aktilerine aýdıtorlyq qyzmet máseleleri boıynsha ózgerister men tolyqtyrýlar engizý týraly» zań jobasy tanystyryldy, dep habarlaıdy QazAqparat tilshisi.
«Zań jobasy aýdıtorlyq qyzmetti, memlekettik aýdıt pen qarjylyq baqylaýdy jáne býhgalterlik esepti jetildirý maqsatynda bir top Qazaqstan Respýblıkasy Parlament depýtattarynyń bastamasymen ázirlendi. Osy zań jobasynyń tujyrymdamasy 2019 jylǵy 15 qarashada zań jobalaý qyzmeti máseleleri jónindegi vedomstvoaralyq komıssııanyń 498-shi otyrysynda ashyq daýys berýmen maquldandy», - dedi depýtat Omarhan Óksikbaev.
Zań jobasy aıasynda depýtattar qoldanystaǵy 5 zańǵa 47 túzetýge bastamashylyq jasady.
Atap aıtqanda, zań jobasy aıasynda aýdıtorlyq qyzmetti retteý jónindegi táýelsiz organdy qurý, ıaǵnı Kásibı keńestiń jumysyn uıymdastyrý eskerilgen.
Depýtattyń paıymynsha, aýdıt sapasyn baqylaýdyń róli artyp keledi.
«Kásibı keńes onyń quryltaıshysy bolatyn mamandandyrylǵan uıymdarmen qurylady. Atalǵan keńestiń múlki kásibı uıymdardan birjolǵy túsimderder esebinen qalyptastyrylady. Olar Kásibı keńestiń múlkine múliktik quqyqty talap etpeıdi. Sonymen birge, múshelik jarna ınstıtýty iske qosylǵan jaǵdaıda aýdıtorlyq qyzmet boıynsha Kásibı keńestiń táýelsizdigi qaǵıdasy buzylady», - dedi O. Óksikbaev.
Kásibı keńes Basqarmasynyń quramyna Qarjy mınıstrliginiń, AHQO, KASE, aýdıtorlyq uıymdar ókilderi kirgen, bul óz kezeginde basqarýdyń korporatıvtik ádisterin engizýge múmkindik beredi.
