Májiliste «Ata baba sózi - danalyq kózi» atty taqyrypta dóńgelek ústel ótti
ASTANA. Mamyrdyń 14-i. QazAqparat /Qanat Mámetqazyuly/ - Keshe, mamyrdyń 13-inde Qazaqstan Respýblıkasy Parlamenti Májilisindegi «Jańa Qazaqstan» depýtattyq toby «Ata baba sózi - danalyq kózi»,- degen taqyrypta dóńgelek ústel ótkizdi. Sharaǵa Qazaqstan Halqy Assambleıasynan saılanǵan Májilis depýtattary túgel qatysty,
dep habarlaıdy QazAqparat.
Basqosýdy «Jańa Qazaqstan» depýtattyq tobynyń jetekshisi Qaırat Sádýaqasov ashyp, atalǵan top múshesi Lıýdmıla Hochıeva «Bosaǵada durys tárbıe alǵan bala Otan, Baqyt, Baılyq, Bereke»,- degen qasıetterdi jan dúnıesimen sezinedi»,- dep alqaly jıynnyń betasharyn jasady. Sonymen qatar, jıyn barysynda QR ǴA akademıgi, M.Áýezov atyndaǵy Ońtústik Qazaqstan Ýnıversıtetiniń professory Ásma Qalybekova «Ósip kele jatqan urpaq tárbıesinde qazaqtardyń halyqtyq pedogogıkasynyń ıdeıalaryn qoldaný» degen taqyrypta keńeıtilgen baıandama jasady. Odan keıin Eýrazııa ulttyq ýnıversıtetiniń stýdentteri kezekpen sóz alyp, talqylaý suhbatqa qatysty. Álkeı Áljanov «Ata baba sózi - danalyq kózi», Dınara Valeeva «Shańyraq shýaǵy - altyn mura», Gúlmıra Smanova «Adamzat músinshisi - ana», Ashat Ataý «Ulǵa otyz úıden, qyzǵa qyryq úıden tyıym» degen taqyryptardy taldady.
«Búgingi kún - kesheginiń jemisi, erteńginiń bolmysy deıdi dana halqymyz. Qazaq halqy óziniń san ǵasyrlyq tarıhı jolynda memlekettik damýdyń evolıýtsııalyq satylaryn basynan ótkerdi. Qazirgi kezdegi ulan ǵaıyr jerimiz ben elimizdiń aman saqtap qalynǵany - ata-babalarymyzdyń namysty rýhtary men bolashaqqa degen jigerli úmitteriniń aıqyn jemisi. HHІ ǵasyrdaǵy ata babalar sabaqtastyǵy qandaı deńgeıde damyp kele jatyr degen suraq eliniń bolashaǵy úshin beı-jaı qaramaıtyn árbir azamatty tolǵandyratyny haq»,- deıdi jastar óz sózderinde babalaryna taǵzym etip.
Osy basqosýda jastar «Otan ot basynan bastalady», «El bolam deseń - besigińdi túze», «Uıada ne kórseń ushqanda sony ilersiń» degen sekildi halyq danalyqtarynyń urpaqtan urpaqqa jalǵasyp kele jatqan sebepterin ashýǵa tyrysty.
Basqosý sońynda dóńgelek ústel jumysyna baılanysty usynystar qabyldandy. Onda Qazaq etnopedogogıka -etnopsıhologııa ınstıtýtyn qurý, BAQ arqyly jas urpaqtyń patrıottyq tárbıesine baǵyttalǵan saıasatta halyqtyq pedogogıkany kórsetetin arnaıy baǵdarlamalar qurý, balabaqsha, orta mektep, JOO «ulttyq sana-sezim» pánin engizý sekildi birqatar usynystar aıtyldy.
