Májiliste áskerı-ǵylymı zertteý máseleleri talqylandy
ASTANA. QazAqparat - Qazaqstanda áskerı-ǵylymı áleýet tolyq paıdalanylmaı keledi. Bul týraly Parlament Májilisinde áskerı bilim berýdi damytý taqyrybyndaǵy Úkimet saǵatynda palatanyń Halyqaralyq ister, qorǵanys jáne qaýipsizdik komıtetiniń tóraǵasy Muhtar Erman málim etti, dep habarlaıdy QazAqparat.
«Áskerı bilim - qazaqstandyq bilim berý júıesiniń ajyramas, quramdas bóligi dep qaraýymyz kerek. Osyǵan baılanysty, áskerı jáne azamattyq joǵary oqý oryndary ózara tyǵyz qarym-qatynasta bolyp, úzdik pedagogıkalyq tájirıbelerimen almasýy tıis. Sonda ǵana áskerı bilim berýdiń berik negizin qalap, joǵary deńgeıin qamtamasyz etýge bolady. Sonymen qatar, qorǵanys-ónerkásip keshenine joǵary bilikti ınjener-tehnık mamandar daıarlaý áli sheshimin tappaı kele jatqanyn aıta ketý kerek. Qorǵanys-ónerkásip kesheni salasyna mamandardy qajet bolsa sheteldiń aldyńǵy qatarly oqý oryndarynda oqytyp, tıisti qorǵanys kásiporyndarynda tájirıbeden ótkizý qajet», - dep toqtaldy depýtat.
Onyń paıymynsha, ǵylymdy damytpaıynsha, qazirgi zamanǵa saı kásibı armııa qurý múmkin emes. Taldaý nátıjeleri kórsetip otyrǵandaı, qoldaǵy bar ǵylymı áleýet tolyq paıdalanylmaı keledi.
«Innovatsııalarǵa qatysty bir máselege toqtalyp óteıin. Resmı derekterge qaraǵanda, 2009 jyldan bastap kúni búginge deıin áskerı taqyryp boıynsha 38 avtorlyq kýálik pen patentter tirkeldi. Olardyń negizgi taqyryptary: qazirgi zamanǵy áskerı bilim berý júıesi, basqarý júıesi, aǵylshyn tilin úırený úshin mobıldi júıe, jańa ınjenerlik-tehnıkalyq sheshimder. Degenmen, áskerı ǵylymı zertteý nátıjelerin ázirleý jáne engizý jumysyn kúsheıtý kerek. Osyǵan baılanysty Qorǵanys mınıstrligi bolashaqqa arnalǵan ǵylymı baǵyttardy aıqyndap, olardy tıisinshe qarjylandyrýdy Qazaqstan Respýblıkasynda ǵylymdy damytýdyń basym baǵyttary tizbesine engizýi tıis. Ulttyq jáne Injenerlik akademııalarynyń áleýetin qoldaný qajet. Qorǵanys qabiletin damytý úshin ozyq ıdeıalar men tásilderdi, jańa tehnologııalardy izdestirý, damytý jáne engizý maqsatynda áskerı ınnovatsııalyq tehnopolıs qurý týraly sheshim qabyldaǵan RF tájirıbesimen tanysý artyq bolmas dep esepteımiz», - dedi Muhtar Erman.
