Májiliste asharshylyqqa 80 jyl tolýyna baılanysty eske túsirý sharasy ótti
ASTANA. 29 mamyr. QazAqparat - Búgin Parlament Májilisinde Qazaqstandaǵy jappaı asharshylyqqa 80 jyl tolýyna baılanysty zulmattyń qurbandaryn eske túsirýge arnalǵan dóńgelek ústel jıyny bolyp ótti.
Sharaǵa Májilistiń Áleýmettik-mádenı damý komıteti muryndyq boldy.
Eske sala ketsek, bıyl 1932 jylǵy ashtyqqa 80 jyl jáne 1937 jyldardaǵy jappaı qýǵyn-súrginge 75 jyl tolyp otyr. Osyǵan oraı Elbasy N. Nazarbaevtyń tapsyrmasymen asharshylyq qurbandaryn eske alý sharalary búkil el aýmaǵynda keńinen atalyp ótýde.
Al Májilistegi sharanyń maqsaty - ashtyq saldarynan qyrylǵan sansyz jazyqsyz bozdaqtardyń rýhyna taǵzym etý, tarıhty túgendeý.
«Qazaq halqyn tarıhı damý jolynan jańyldyryp, orasan zor demografııalyq apatqa ushyratqan ashtyqtan beri 80 jyl ótti. Elimiz bolyp osy náýbet qurbandaryn eske alyp, mıllıondar rýhyna taǵzym etýdemiz. Máselen, Kerekýde ashtyq qurbandaryna arnalǵan eskertkish soǵyldy. Osyndaı taǵy bir qadam Ońtústik Qazaqstanda da júzege asty, kúni erteń elordada eskertkish ashylatyn bolady. BAQ-ta ashtyq shyndyǵy men sumdyǵy tolassyz jarııalanýda», - dedi jıyndy ashyp sóılegen depýtat Aldan Smaıyl.
Shara barysynda tarıhshy ǵalymdar, aqyn-jazýshylar, qoldan jasalǵan ashtyqqa qatysty faktilerge kóz júgirtip, ocy náýbet qasiretiniń tarıhta alar orny, zulmattyń sebep-saldary týraly baıandamalar jasaldy.
Eske sala ketsek, 1927-30 jyldardaǵy «Uly ashtyq» qazaqtyń Altaıdan Atyraýǵa deıingi aralyqtyń bárin qamtydy. 40,5 mln. bas maldan 4,5 mıl. mal ǵana qaldy. Halyq túgel qyrylýǵa shaq qaldy.
