Májiliste áleýmettik kómek usyný tetikterin odan ári jetildirý máseleleri qaraldy
Depýtattar aldynda sóz sóılegenEńbek jáne halyqty áleýmettik qorǵaý vıtse-mınıstri Erlan Áýkenov qazirgi kezde mınıstrlik ázirlep jatqan jáne osy jyldyń kúzine qaraı aıaqtalýy josparlanǵan «Otbasynyń tsıfrlyq áleýmettik kartasy» aqparattyq júıesi adamdardyń ál-aýqaty deńgeıin belsendi formatta aıqyndaýǵa múmkindik beretinin atap aıtty. Bul muqtaj azamattarǵa áleýmettik kómek kórsetýdiń málimdeýshilik modelinen anyqtaýshylyq modeline kóshýge múmkindik beredi.
Otyrys barysynda depýtat Janat Omarbekova respýblıkada biliktiligi joǵary áleýmettik qyzmetkerlerge suranys óte kóp ekenine toqtalyp, olardyń qyzmetin jańǵyrtý qajettigin aıtty. Sondaı-aq múmkindigi shekteýli balalarǵa arnalǵan qashyqtan oqytýdyń arnaıy baǵdarlamasyn jetildirýdyń mańyzdylyǵyna mán berdi.
«Turǵyndardyń muqtaj azamattardyń áleýmettik kómek alýy jónindegi barlyq shaǵymyna, eskertýi men usynysyna jan-jaqty taldaý júrgizip, tıisti sharalar qabyldaý qajet», - dedi otyrysty qorytyndylaǵan Komıtet tóraǵasy Beıbit Mamraev. Sonymen qatar depýtat B. Mamraev shalǵaı eldi mekenderdegi muqtaj turǵyndardyń áleýmettik kómekti ýaqtyly alýy maqsatynda bank qyzmetteriniń qoljetimdiligin qamtamasyz etý kerektigine basa nazar aýdardy.
Jalpy, Komıtet shyn muqtaj azamattarǵa áleýmettik qoldaý kórsetýdiń aıqyn tetigin jasaýdy usyndy. Ol keıbir adamdardyń tarapynan masyldyq pıǵyl tanytýdyń kez kelgen faktisine jol bermeýi tıis. Sondaı-aq jumyssyz, tabysy az azamattardy jáne múmkindigi shekteýli adamdardy eńbekke tartý jáne olardyń ekonomıkalyq belsendiligin arttyrý múmkindikterin keńeıtý máselesin júıeli túrde pysyqtaý usynyldy.
