Májiliste áleýmettik qamsyzdandyrýǵa baǵyttalǵan zań jobasynyń tanystyrylymy ótti
ASTANA. 28 maýsym. QazAqparat /Qanat Mámetqazyuly/ - Búgin Qazaqstan Respýblıkasy Parlamenti Májilisiniń Áleýmettik mádenı damý komıtetinde «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Zań jobasy zeınetaqymen qamsyzdandyrý jáne mindetti áleýmettik saqtandyrý týraly qoldanystaǵy zańnamadaǵy kemshilikterdi joıýdy qarastyratyn tórt zańnamalyq aktige ózgerister men tolyqtyrýlar engiziledi. Atap aıtqanda, «Salyq jáne bıýdjetke túsetin basqa da mindetti tólemder týraly» QR Kodeksi, «QR zeınetaqymen qamsyzdandyrý týraly» Zańy, «Aqsha tólemi jáne aýdarymy týraly» QR Zańy, «Mindetti áleýmettik saqtandyrý týraly» QR Zańyna ózgerister qarastyrylady. Engiziletin ózgerister men tolyqtyrýlar mindetti zeınetaqy jarnalarynyń tolyq jáne (nemese) ýaqtyly aýdarylýyn salyq organdarynyń baqylaýynyń tıimdiligin arttyrýǵa, zeınetaqy annýıtetin satyp alý kezinde azamattardyń áleýmettik quqyǵyn keńeıtýge baǵyttalady. Budan bólek, azamattardyń zeınetaqy annýıtetterin alǵan kezde erikti, erikti kásiptik zeınetaqy jarnalaryn jáne (nemese) jeke qarajattary arqyly áleýmettik quqyqtaryn keńeıtýge, áleýmettik tólemderdiń (júktiligi jáne bosanýy boıynsha) mólsherin belgileý kezinde joǵaltqan kiristiń ornyn toltyrý mehanızmin ózgertýge baǵyttalady.
Zań jobasyn iske asyrý respýblıkalyq bıýdjetten qarjy shyǵynyn talap etpeıdi jáne teris áleýmettik-ekonomıkalyq jáne quqyqtyq saldar týdyrmaıdy dep otyr zań jasaýshylar. Atalǵan qujat boıynsha jumys toby qurylyp, oǵan depýtat Svetlana Ferho jetekshilik jasaıtyn boldy.
