Májiliste Alash arystarynyń esimderin jergilikti jerde ulyqtaý máselesi kóterildi
Bıyl 30 jyldyǵy atalyp ótetin Qazaq Eli Táýelsizdigi jolyndaǵy ǵasyrlar boıǵy janqııarlyq kúrestiń ishinde Alashordanyń orny aıryqsha! Basty Urany - Jerdi satpaý, Tildi saqtaý bolǵan Alash arystaryn ulyqtaýdy QR Prezıdenti Toqaev «Táýelsizdik bárinen qymbat» atty maqalasynda bastap berdi: «Biz kezinde elge qyzmet etýdiń ozyq úlgisin kórsetken Alash qaıratkerlerinen taǵylym alamyz... Táýelsizdigimizdiń mereıtoıy aıasynda osyndaı birtýar tulǵalardy eske alyp, olardyń murasyn jastarymyzǵa jáne búkil álemge pash etýimiz kerek» – dep, atap kórsetti. Alaıda, Alash dese qarapaıym kópshiliktiń esine tek Alashorda úkimetiniń kórnekti kósemderi Álıhan Bókeıhan, Ahmet Baıtursynuly, Mirjaqyp Dýlatuly sekildi birneshe tulǵanyń esimi keledi. Shyn máninde bul tizim áldeqaıda aýqymdy», - dedi Q. Isa Parlament Májilisiniń jalpy otyrysynda Premer-Mınıstriniń orynbasary Eraly Toǵjanovtyń atyna joldaǵan depýtattyq saýalynda.
Onyń aıtýynsha, elimizdiń túkpir-túkpirindegi Alash ustanymyn nasıhattaǵan, sol úshin qurban bolǵan jergilikti Alash qozǵalysy qaıratkerleriniń erlikteri eskerilmeı, esimderi álige deıin belgisiz bolyp otyrǵany ókinishti. Bulardyń bári Táýelsiz Qazaq Eli úshin qurban bolǵandar!
«Sol sebepten, 2019 jyly «Aq jol» partııasynyń tóraǵasy «Alash» mádenıet jáne rýhanı damý ınstıtýtymen birigip, buryn belgisiz bolyp kelgen 700-den astam tulǵany quraıtyn jergilikti Alash qaıratkerleriniń tizimin daıyndady. Alashtanýshy ǵalymdardyń zertteýleriniń negizinde jasalǵan tizimge kópshilik qaýymǵa esimderi umyt bolǵan ár óńirdiń jergilikti Alash qaıratkerleri engizildi. Árbir oblys, qala ákimderine sol jerge qatysy bar, sol jerden shyqqan Alashshyl azamattardyń tizimi jiberilip, olardyń attaryń jergilikti jerdegi kóshe, mektep, t.b. nysandar ataýlaryna qoldanýdy usynǵan bolatynbyz. Alaıda, alynǵan jaýaptar kóńilge qonbaıdy. Kóbinese jaýaptar jaltarma sıpatta, buǵan deıin Alashtyń el aýzyndaǵy jıyrma shaqty tanymal basshylarynyń esimderiniń ataýmen shektelgen», - dedi depýtat.
«Sol sebepten, «Aq jol» partııasy, Táýelsizdigimizdiń 30 jyldyq mereıtoıynyń qarsańynda, Alash qaıratkerleriniń esimderin onomastıka turǵysynda qoldanýdy jón sanap, atalǵan tizimdi Úkimetke jiberip otyrmyz. Osyǵan baılanysty, «Aq jol» QDP fraktsııasynyń depýtattary, 2019 jyly biz joldaǵan hattardy jergilikti ákimdikterge qaıta kóterýdi tapsyryp, myńdaǵan Alash arystarynyń qasıetti esimderin jergilikti jerde ulyqtaý sharalaryn baqylaýǵa alýyńyzdy suraıdy», - dedi Qazybek Isa.
