Májiliste aqparatqa qoljetimdilik máselesi boıynsha ozyq tájirıbeler talqylanǵan dóńgelek ústel ótti
ASTANA. 14 jeltoqsan. QazAqparat /Qanat Mámetqazyuly/ - Búgin QR Parlamenti Májilisinde «Aqparatqa qoljetimdilik máselesin zańnamalyq retteý salasyndaǵy elderdiń ozyq tájirıbesi» atty taqyrypta dóńgelek ústel ótti.
Jıynǵa Májilis depýtattary, EQYU-nyń Adam quqyqtary jáne demokratııalyq ınstıtýttar jónindegi bıýrosynyń ókilderi jáne sheteldik sarapshylar men qoǵamdyq uıymdar ókilderi qatysýda.
Esterińizge sala keteıik, «Jarııa aqparatqa qoljetimdilik týraly» zań jobasyn Zańnama jáne sot-quqyqtyq reforma komıtetiniń múshesi Jaqyp Asanov Parlamentarızm ınstıtýtymen birlesip daıyndaǵan bolatyn. Ústimizdegi jyly 23 qyrkúıekte «Nur Otan» HDP janyndaǵy Quqyqtyq Keńestiń uıymdastyrýymen ótken halyqaralyq ǵylymı-tájirıbelik konferentsııada osy zań jobasynyń tanystyrylymy bolyp ótti.
«Jarııa aqparatqa qoljetimdilik máselesi kez kelgen demokratııalyq joldy tańdaǵan memleket úshin asa mańyzdy. Kóptegen damyǵan memleketterde ashyq aqparatty alýǵa jol ashatyn arnaıy zańdar qabyldanǵan. Qazaqstannyń Konstıtýtsııasy boıynsha da eldiń árbir azamaty memleketten aqparat alýǵa, ony paıdalanýǵa jáne taratýǵa quqyly. Degenmen, bizdiń qoldanystaǵy zańnamalarymyz dál osy máseleni tolyǵymen sheship otyrǵan joq. Sony eskere kele birqatar halyqaralyq jáne úkimettik emes uıymdardyń qatysýymen «Jarııa aqparatqa qoljetimdilik týraly» zań jobasy ázirlengen bolatyn», - dedi jıyn barysynda depýtat J. Asanov.
Sonymen qatar, shara barysynda atalǵan zań jobasy boıynsha sheteldik sarapshylardyń saraptamalyq qorytyndysy jarııa etildi.
