Májilispen jáne Úkimetpen birge jańa formatsııadaǵy zańdar qabyldaýymyz kerek - Senat tóraǵasy
Onda depýtattar Memleket basshysy Qasym-Jomart Toqaevtyń VIII saılanǵan Parlamenttiń birinshi sessııasynda Parlament pen Úkimetke júktegen mindetterin talqylady.
Otyrysty ashqan Máýlen Áshimbaev el Prezıdenti belgilep bergen mańyzdy basymdyqtar jańarǵan Parlamenttiń jumysyndaǵy asa ózekti baǵyttar ekenin atap ótti.
«Prezıdentimizdiń tapsyrmalary aıasynda Májilistegi áriptesterimizben jáne Úkimetpen birlesip, jańa formatsııadaǵy zańdar qabyldaýymyz kerek. Ol degenimiz – el damýynyń jańa kezeńinen jol ashatyn, keshendi reformalardy qamtıtyn jáne búgingi syn-qaterler eskerilgen zańdar. Palatanyń kún tártibinde Ádiletti Qazaqstan qurýǵa arnalǵan zańdardy qabyldaý mindeti de tur. Olardyń qatarynda shetelge zańsyz shyǵarylǵan aktıvterdi qaıtarý jónindegi zań jáne memlekettik satyp alý týraly jańa zań bar», – dedi Máýlen Áshimbaev.
Sonymen qatar Senat tóraǵasy Salyq, Bıýdjet, Qala qurylysy jáne Sý Kodeksterin qabyldaý boıynsha jumysty sapaly uıymdastyrýdyń mańyzdy ekenin aıtty.
Memleket basshysy aıqyndaǵan basym baǵyttardyń biri - óńirlerdi damytý. Bul - Senat jumysyndaǵy mańyzdy basymdyqtardyń biri jáne «Óńir» depýtattyq toby atqaratyn qyzmettiń negizi ekeni belgili. Soǵan baılanysty palata spıkeri depýtattyq top jumysynyń basty baǵyttaryn atap kórsetti. Naqty aıtqanda, «Óńir» tobyna múshe senatorlar óńirlerge júıeli túrde shyǵyp, jergilikti halyqpen, onyń ishinde aýyl turǵyndarymen kezdesip, aımaqtaǵy kópshilikti alańdatqan problemalardy anyqtap, olardyń oń sheshilýine yqpal etýi kerek.
Senat tóraǵasy ol úshin dástúrli tetiktermen birge jańa tásilderdi de qoldaný qajet ekenin, sarapshylardy, jurtshylyqty jáne BAQ ókilderin jumyldyra otyryp jumys isteý kerektigin aıtty.
