Májilismenderge venchýrlyq qarjylandyrýdy damytý týraly zań jobasy tanystyryldy
ASTANA. QazAqparat - QR Investıtsııalar jáne damý vıtse-mınıstri Tımýr Toqtabaev májilismenderge «QR keıbir zańnamalyq aktilerine venchýrlik qarjylandyrý máseleleri boıynsha ózgerister men tolyqtyrýlar engizý týraly» zań jobasyn tanystyrdy, dep habarlaıdy QazAqparat tilshisi.
«Álemdik tájirıbede jeke venchýrlyq ınvestıtsııalaý ınnovatsııalyq-tehnologııalyq bıznesti qoldaý baǵytynda edáýir tanymal. Naqtyraq aıtqanda, venchýrlyq ınstıtýttar arqyly jetekshi elderde ınvestıtsııalaýdyń kelesi mólsheri júzege asyrylyp jatyr: ıaǵnı, venchýrlyq ınstıtýttar arqyly AQSh-ta 52 mlrd dollar, Qytaıda 15,5 mlrd dollar, EO-da 10,6 mlrd dollar, Úndistanda 5,2 mlrl dollar ınvestıtsııa aınalymda. Aıta keterligi, ınnovatsııalyq kóshbasshy elderdiń qataryndaǵy Izraıl men Sınapýrda venchýrlyq qorlar tyń tehnologııalardy engizýde úlken mańyzǵa ıe», - dedi vıtse-mınıstr.
Onyń aıtýynsha, Ońtústik Koreıada 1997 jyly venchýrlyq bızneske qoldaý bildirý týraly zań qabyldanyp, tehnologııalyq saqtandyrý alý múmkindigine qol jetkizilgen.
«ıAǵnı, ol memlekettiń úkimeti jeke ınvestıtsııalar men venchýrlyq qorlardyń jumysyna kepildik beredi. Koreıa úkimeti áý basta bul baǵytty qoldaý úshin qarajattyń 50 paıyzyn aýdaryp otyrǵan. Osynyń nátıjesinde, Ońtústik Koreıada venchýrlyq bıznestiń ósimi baıqalyp, álemdik naryqqa jol ashyldy», - deıdi Tımýr Toqtabaev.
Vıtse-mınıstr álem elderin úlgi ete kele Qazaqstandaǵy jaǵdaı týraly aıtyp berdi.
«Venchýrlyq kapıtaldyń enjar naryǵy saqtalyp tur. Qazaqstanda venchýrlyq kapıtaldyń irgesi qalana qoıǵan joq. Sózsiz, memleket ózge de elder sekildi ınnovatsııalyq sektorǵa qoldaý bildirip, ınnovatsııalyq jobalarǵa granttar bólýde. Astanada startaptardyń haby ashylǵaly jatyr. Dese de, memlekettik qoldaýlardyń bul baǵyttary jalpy venchýrlyq mehanızm bolyp tabylmaıdy», - dedi ol.
Tımýr Toqtabaev zań jobasynyń mindetteri men maqsattaryn atady.
«Zań jobasynyń basty maqsaty - venchýrlyq qarjylandyrý salasynda qoǵamdyq qarym-qatynasty quqyqtyq retteýdi jetildirý, Qazaqstanda venchýrlyq jeke naryqty qoldaý. Mindeti: venchýrlyq qarjylandyrýdy damytý úshin quqyqtyq bazany qurý, ınnovatsııalyq salany memlekettik qoldaý júıesin jetildirý, áý bastaǵy kezeńde venchýrlyq naryqty damytý kezinde memleketti jeke sektordyń senimdi serigi qylý, venchýrlyq qarjylandyrýdy júzege asyrýda qazaqstandyq jańa kelisimdi qurylymdardy engizý arqyly jeke kapıtalǵa jaıly jaǵdaı jasaý bolyp tabylady», - dedi Tımýr Toqtabaev.
