Májilismender «Jol júrisi týraly» jańa zań jobasyn talqylaý úshin astanalyq jol polıtsııasynyń mekemesinde boldy
ASTANA. 24 mamyr. QazAqparat - 2013 jyldyń 24 mamyrynda Astana qalalyq ІІD Jol polıtsııasy basqarmasy tirkeý-emtıhan qabyldaý bóliminiń ǵımaratynda «Jol júrisi týraly»,
«Jol júrisi týraly Qazaqstan Respýblıkasynyń keıbir zańnamalyq aktilerine tolyqtyrýlar men ózgerister engizý týraly» zań jobalaryn talqylaý boıynsha Parlament Májilisi jumys tobynyń kóshpeli otyrysy ótti. Bul týraly ІІM Jol polıtsııasy komıtetinen málim etti.
Otyrysqa Parlament Májilisiniń depýtattary, ІІM Jol polıtsııasy komıtetiniń basshylyǵy men Kólik jáne kommýnıkatsııa mınıstrliginiń ókilderi qatysty.
Kóshpeli otyrysty ótkizý «Jol júrisi týraly» zańjobasynda kólik quraldaryn jol júrisine qatystyrý, adamdarǵa kólik quraldaryn basqarýǵa ruqsat berý boıynsha normalardy talqylaýmen baılanysty.
Otyrys barysynda depýtattarǵa azamattarǵa júrgizýshi kýálikterin berý, senimhat boıynsha kólik quraldaryn basqaratyn adamdardy tirkeý, kólik quraldaryn tirkeý jáne memlekettik tirkeý nómirlik belgilerin berý tártibi tanystyryldy.
Aıta keteıik, «Jol júrisi týraly» zań jobasynyń negizgi erejeleri alty basymdyq boıynsha bekitilgen: jol júrisi salasynda memlekettik basqarý júıesi; jol júrisi qaýipsizdigin qamtamasyz etý; jol qaýipsizdigin qamtamasyz etý; kólik quraldarynyń qaýipsizdigin qamtamasyz etý; jol júrisi qatysýshylarynyń quqyqtary men mindetteri; kólik quraldary men adamdarǵa jol júrisine qatysýyna ruqsat berý.
