Májilismender UBT-ǵa engizilýi múmkin ózgeristerge qarsy shyqty
ASTANA. 30 qańtar. QazAqparat - Búgin Parlament Májilisinde Úkimet basshysyna bir top halyq qalaýlylary atynan saýal joldaǵan depýtat Gúlmıra Isimbaeva Ulttyq biryńǵaı testileýdegi eki basty problemany sheshý máselesin kóterdi.
Depýtattyń aıtýynsha, «Bilim týraly» QR Zańyna sáıkes, memlektetik jáne orys tilderi 2008 jyldan beri UBT baǵdarlamasyna engizilgen mindetti pánder bolyp tabylady. Alaıda, «besinshi pán» nátıjeleri, ıaǵnı orys tildi mektepter úshin qazaq tili, al qazaq tildi mektepter úshin orys tili páninen alynǵan ball bilim granttaryn ıelený konkýrsynda esepke alynbaıdy. «Bul teńgerimsizdik týdyryp, túlekterdiń múmkindigin shekteıdi, pánder arasynda kemsitýshilikke ákep soǵady. Solaı bola tura, «5» degen baǵa alý úshin atalǵan eki pánnen bir ball ǵana jetispeı tursa, sonyń ózi oqýshynyń «Altyn belgi» alý múmkindiginen aıyrady. Osylaısha, «besinshi pánniń» nátıjeleri tek teris jaǵdaılar boıynsha ǵana esepke alynyp otyr», - deıdi depýtat G. Isimbaeva.
Onyń sózine qaraǵanda, bul problemaǵa 2008 jyldyń ózinde depýtattar nazar aýdaryp, saýal joldaǵan bolatyn. Alaıda, alynǵan jaýap qanaǵattandyrylmady ári osy jyldar ishinde naqty sharalar qabyldanbady. «Budan bólek, saılaýshylarmen júzdesý barysynda UBT-ǵa engizilý múmkindigi qarastyrylyp jatqan testileýdiń eki kezeńine qatysty jurtshylyq tarapynan alańdaýshylyqtar boldy. Álgi engizilýi múmkin eki kezeńniń biri - orta bilimdi attestattaý bolsa, ekinshisi - kásibı joǵary oqý ornyna túsýge arnalǵan testileý. Bul jańalyq bizdiń oıymyzsha, sonshalyqty dálelsiz, dáıeksiz. Óıtkeni, joǵary oqý ornyna túsý talapkerlerdi keshendi testileýden ótkizý arqyly retteledi. Sonymen qatar, eki kezeń engizý qoldanystaǵy bilim zańnamasyna qaıshy bolyp tabylady. Máselen, zańymyzda «UBT jalpy orta bilim uıymdarynda oqıtyn oqýshylardyń qorytyndy attestattaý formasynyń biri bolyp tabylady jáne orta jáne joǵary oqý ornynan keıingi bilim beretin uıymdarǵa túsý emtıhanymen qatar qarastyrylatyn bolady» dep jazylǵan»- deıdi G. Isimbaeva.
Bul rette depýtat kóterilgen máseleni eskere otyryp, Úkimet basshysynan eki máseleni sheshý tetikterin aıqyndaýdy suraıdy. Onyń biri UBT barysynda «besinshi pánniń» nátıjelerin de konkýrstyq balǵa qosa esepteý. «Ekinshiden, talapkerlerdiń Biryńǵaı ulttyq testileý men keshendi testileýdiń nátıjelerin úılestirý, sondaı-aq bilim salasyndaǵy qoldanystaǵy zań talaptarynyń saqtalýyn qamtamasyz etý», - deıdi G. Isimbaeva.
