Májilismender shymkenttik jastarmen kezdesti
ASTANA. QazAqparat - Qazaqstan Respýblıkasy Parlament Májilisiniń depýtattary, «Nur Otan» partııasy fraktsııasy músheleri Erjan Qudaıbergen, Káribaı Musyrman, Baqtyqoja Іzmuhambetov, Janat Jarasov, Ersultan Bekturǵanov, Muhtar Erman men Fahrıddın Qarataev aımaqtarǵa jumys sapary barysynda Shymkent qalasyndaǵy M.Áýezov atyndaǵy Ońtústik Qazaqstan Memlekettik ýnıversıtetiniń stýdentterimen jáne oqytýshylarymen kezdesti. Bul týraly Parlamenttiń atalmysh palatasynyń baspasóz qyzmetinen málime tti.
Júzdesý Elbasynyń «Qazaqstannyń úshinshi jańǵyrýy: jahandyq básekege qabilettilik» atty halyqqa arnaǵan Joldaýyn jáne saıası reformalardy nasıhattaý maqsatynda ótti.
Jetpis jyldyq tarıhy bar, bilim jáne zertteý ınfraqurylymy damyǵan, ǵylymı mektepteri qalyptasqan, joǵary tehnologııalar salasynda kúrdeli máselelerdi sheshýge qabiletti kadrlyq áleýetke ıe M.Áýezov atyndaǵy Ońtústik Qazaqstan Memlekettik ýnıversıteti kópsalaly iri ýnıversıtet bolyp tabylady. Ýnıversıtet búkil Qazaqstannyń kásiporyndary men uıymdary úshin mamandar daıyndaıdy. Sondyqtan, bul oqý ordasynda ótkizilgen kezdesý barysynda Elbasy Joldaýy jan-jaqty túsindirildi.
Depýtat Ersultan Bekturǵanov Joldaýdaǵy negizgi basymdyqtar men berilgen tapsyrmalardy naqtylaı otyryp: «Elbasy Joldaýynda jańa talaptarǵa saı jańa kadrlardy daıarlaýǵa úlken kóńil bólingen. Búgingi tańda jumys berýshilerdiń tereń logıkalyq oılaı alatyn, jańa bilimderdi qordalaýǵa qabiletti mamandarǵa degen qajettilik artqan. Biz sizderge jańa býyn tehnıkasy men tehnologııalaryn jasaýǵa, ǵylymı zertteýler men ázirlemelerge kúsh jumsaıdy degen úmit artyp otyrmyz.Sondyqtan sizder tehnologııa, osy zamanǵa saı ıdeıalar, álemniń ǵylymı progress jańalyqtaryna kóńil bólýlerińiz kerek», - dep jastarǵa jol siltedi.
Májilis depýtaty Káribaı Musyrman elimizdegi saıası reformanyń mańyzdylyǵy týraly aıta kele: «Bılik tarmaqtary arasynda ókilettikterdi qaıta bólý eldi jańǵyrtýǵa baǵyttalǵan mańyzdy qadam. Bul reforma qazaqstandyq memlekettilik pen demokratııany damytý jolynyń logıkalyq jalǵasy bolyp, memlekettik basqarý júıesiniń jaqsarýyna oń áser etedi»,- dep túsindirdi.
Sonymen qatar, Májilis depýtattary jastardyń patrıotızimine, úsh tildi jetik meńgerýge asa mán beretindigi týraly aıtty. Sondaı-aq, kezdesý barysynda stýdent jastar halyq qalaýlylaryna suraqtar qoıyp, olarǵa tolyqqandy jaýaptar aldy.
