Májilismender ShQO-da Ákimshilik quqyqbuzýshylyq kodeksiniń jobasyn talqylady
ASTANA. QazAqparat - Búgin Shyǵys Qazaqstan oblysynda Májilis depýtaty Nurlan Ábdirovtiń tóraǵalyǵymen Májilistiń Zańnama jáne sot-quqyqtyq reforma komıtetiniń keńeıtilgen otyrysy ótti, dep habarlaıdy QazAqparat palatanyń baspasóz qyzmetine silteme jasap.
28 qyrkúıekteKomıtettiń depýtattary aldyn ala bes topqa bólinip Shyǵys Qazaqstan oblysynyń birqatar aýdandary men qalalarynyń (Óskemen, Semeı, Rıdder qalalary men Glýbokoe, Ulan, Shemonaıha aýdandarynyń) sýdıalary, prokýrorlary, ishki ister jáne ádilet organdarynyń qyzmetkerlerimen, sondaı-aq qoǵam ókilderimen kezdesýler ótkizdi.
Al 29 qyrkúıekte Óskemende ótken Komıtettiń keńeıtilgen otyrysyna sýdıalar, ádilet, quqyqqorǵaý organdarynyń jáne oblys ákimdigi men birshama múddeli ortalyq memlekettik organdardyń qyzmetkerleri, sonymen qosa, «Nur Otan» partııasy men «Atameken» UKP-nyń jáne basqa da bıznes qaýymdastyqtar men úkimettik emes uıymdardyń ókilderi qatysty.
Sharaǵa halyq qalaýlylary men ortalyq memlekettik organdardyń ókilderimen qosa, «Birlik» jáne Jalpy ulttyq sotsıal-demokratııalyq partııalary men úkimettik emes uıymdardyń ókilderi de belsendilik tanytty.
Kóshpeli otyrystyń negizgi taqyryby retinde Úkimettiń Májiliske usynǵan Ákimshilik quqyqbuzýshylyq týraly kodekske (ázirleýshi - Ádilet mınıstrligi) engizilgen túzetýler talqylandy.
Zań jobasy Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýyn oryndaý maqsatynda ázirlengen.
Atalmysh shara aıasynda birqatar memlekettik organdardyń, onyń ishinde Ádilet mınıstrligi, Joǵarǵy Sot, Bas prokýratýra, Іshki ister mınıstrligi, sondaı-aq «Atameken» UKP men Respýblıkalyq advokattar kollegııasynyń Ákimshilik quqyqbuzýshylyq týraly kodeksin quqyqtyq qoldaný týraly tyńdaý ótkizildi.
Kóshpeli otyrystyń qorytyndysynda aıtylǵandaı, talqylanǵan máseleler boıynsha barlyq usynystar men eskertýler Májilistiń Zańnama jáne sot-quqyqtyq reforma komıtetiniń múshesi, Májilis depýtaty Arman Qojahmetov jetekshilik etetin Zań jobasy boıynsha Jumys tobynda eskeriletin bolady.
