Májilismender men quqyq qorǵaýshylar ómir boıy bas bostandyǵynan aıyrý túrindegi jazanyń oryndalýy máselelerin talqylady
Jumys kezdesýi Almaty qalasynda «Adam quqyǵy hartııasy» qoǵamdyq qorynyń keńsesinde ótti. Saraptaý tobyna Májilistiń zańnama jáne sot-quqyqtyq reforma komıtetiniń hatshysy S. Bychkov, depýtattar, QR Prezıdenti janyndaǵy Memlekettik basqarý akademııasynyń Memlekettik jáne jergilikti basqarý ınstıtýtynyń dırektory Z. Fedotova, QR ІІM QAJK tóraǵasynyń orynbasary M. Aıýbaev, ǵylym jáne bilim berý salasynyń ókilderi, «Adam quqyǵy hartııasy» qorynyń atqarýshy dırektory J. Turmaǵambetova, Ortalyq Azııadaǵy PRI óńirlik dırektory S. Mektepbaeva jáne prokýrorlar men sýdıalar kirip otyr. Olar QR Qylmystyq-atqarý kodeksi jańa redaktsııasynyń jumysy sheńberinde birqatar máselelerdi talqylady. Keńes barysynda quqyq qorǵaýshylardyń saraptaý toby sottalǵandar sot zalynan túzeý mekemelerine deıin ózderi barýyn usyndy. Bul baıqaýsyzda qylmys jasaǵandar men alǵashqy ret bir jylǵa deıin sottalǵandarǵa ǵana qatysty. Sondaı-aq keńeste túrmelerde azamattyq baqylaýdy kúsheıtýge baılanysty syndarly pikirler aıtyldy. Atap aıtqanda, qoǵamdyq qadaǵalaý komıssııasynyń ókildikteri men olardyń áreket etý merzimi týraly máseleler talqylandy.
Budan basqa, saraptaý keńesiniń músheleri QR Qylmystyq-atqarý kodeksiniń jańa redaktsııasynda basa mán berilgen sottalýshylardyń quqyqtaryn qorǵaýǵa baılanysty máselelerdi talqylady.
