Májilismender elordadaǵy qoǵamdyq oryndar men aýlalardyń jaǵdaıyn tekserdi

ASTANA. QazAqparat - Májilis depýtattarynyń óńirlerde halyqpen kezdesýleri jalǵasýda, dep habarlaıdy QazAqparat QR Parlamenti Májilisiniń baspasóz qyzmetine silteme jasap.

Búgin Májilistegi «AMANAT» partııasy fraktsııasynyń músheleri Pavel Kazantsev pen Marat Bashımov Astana qalasyndaǵy «Baıqońyr» aýdanynyń qoǵamdyq jerleri men aýlalarynyń jaı-kúıimen tanysty. Qaladaǵy saıabaqtar, alańdar, basqa da nysandar partııanyń saılaýaldy baǵdarlamasyn iske asyrý jónindegi Jol kartasyna kiredi.

Depýtattar aldymen Astananyń 25 jyldyǵy qarsańynda ashylǵan «Jýrnalıster alleıasyna» bardy. Joba avtorlarynyń paıymdaýynsha, alań negizinen BAQ qyzmetkerleri bas qosatyn, ortaq kásibı jetistikterdi atap ótetin jáne mádenı-buqaralyq is-sharalar ótkizetin orynǵa aınalýǵa tıis.

– Bul jerde buryn eski jylý berý magıstrali bar edi. Qazir qalalyqtar úshin tamasha demalys ornyna aınaldy. Sonymen qatar jaqyn mańda birneshe turǵyn úı kesheni salyndy. Onda jastar kóp turady. Qurylys jumysyna qazaqstandyq ónimderdiń paıdalanylǵanyn da atap ótken jón, – dedi Pavel Kazantsev.

Depýtattar «Baıqońyr» aýdanynyń eski ortalyǵynda ornalasqan Egemen Qazaqstan men Kenesary kósheleriniń qıylysyndaǵy jańartylǵan alańmen de tanysty. Abattandyrý barysynda munda shaǵyn sáýlet formalary, jaryq baǵanalary, oryndyqtar qoıylyp, demalys aımaqtary quryldy. Kógaldandyrý boıynsha qosymsha jumys atqarylyp, arnaıy sýarý júıesi ornatyldy.

Sonymen birge depýtattar Kenesary kóshesi 40 mekenjaıyndaǵy «7 Kontınent» turǵyn úı kesheniniń aýlasyna bardy. Munda turǵyndar úshin eki sport alańy, átkenshekteri bar demalys aımaǵy, balalar oıyn alańdary, sondaı-aq arnaıy júgirý joly ornatylǵan.

– Demalýǵa jáne adamdarmen erkin qarym-qatynas jasaýǵa arnalǵan oryndar, jaıaý júrginshiler joldary, alańdar, kósheler, saıabaqtar, jasyl jelekter qala turǵyndarynyń ómir súrý sapasyn arttyrady. Mundaı qoǵamdyq jerler men aýlalardyń damýy qazir óte mańyzdy jáne ony halyq ta qoldaıdy. Damý strategııasy aıasynda shahar aldynda úsh negizgi maqsat tur – jaıly qalaǵa aınalý, onyń turaqty damýyn qamtamasyz etý jáne salaýatty ómir salty úshin jaǵdaı jasaý. Osy baǵytta atqarylar jumys áli kóp. Bul máseleni partııa baqylaýǵa aldy, – dedi depýtat Marat Bashımov.

Búginde «Baıqońyr» aýdanynda taǵy 23 qoǵamdyq oryn ashý josparlanyp otyr.

Aıta keteıik, Májilis depýtattarynyń halyqpen kezdesýi 1 qyrkúıekke deıin jalǵasady. Onda halyq qalaýlylary óńirlerge baryp, problemalyq nysandarmen tanysyp, óndiristerdi aralaıdy.