Májilismender dástúrli senbilikte 200-den astam kóshet otyrǵyzdy
ASTANA. QazAqparat - Búgin elordadaǵy dástúrli kóktemgi senbilikke «Nur Otan», «Aq jol», QHKP saıası partııalarynyń Májilistegi fraktsııa músheleri men Qazaqstan halqy Assambleıasynan saılanǵan depýtattar, Apparat qyzmetkerleri qatysty, dep habarlaıdy parlam.kz.
Bul joly parlamentshiler «Han Shatyr» oıyn-saýyq ortalyǵynyń mańaıyndaǵy kósheni abattandyryp, kógaldandyrýmen aınalysty.
Senbilikke 91 Májilis depýtaty, 162 Apparat qyzmetkeri shyqty. Qalanyń saltanatyna taǵy da eki júzdiń ústinde qaıyń men shyrsha kóshetin otyrǵyzyp, jańa bir alleıa jasap, úles qosty. Bul aǵashtardyń kósheti Elbasynyń bastamasymen qurylǵan Astana qalasynyń eýrazııalyq alańqaıynda ósirilip jatqan jasyl beldeýden ákelindi.
