Májilismender «basym týrıstik aýmaqty» basqaratyn kompanııany qurýǵa qarsy boldy
Zań jobasy boıynsha qorytyndyny oqyǵan ekonomıkalyq reforma jáne óńirlik damý komıtetiniń múshesi, depýtat Pavel Kazantsev qujattyń basty mindetterin atady.
«Zań jobasy «basym týrıstik aýmaqtar» uǵymyn bekitý, osyndaı aýmaqta týrıstik qyzmet obektilerin qurý kezinde ınvestıtsııalyq preferentsııalar berý, týroperatorlyq qyzmetti shyǵý, kelý jáne ishki týrızm salalaryna bólý, shyǵý týrızmi salasynda azamattardyń quqyqtaryna kepildik berý júıesin jetildirý jáne «trofeılik ań aýlaý» uǵymyn engizýdi kózdeıdi», - deıdi Pavel Kazantsev.
Depýtattyń aıtýynsha, zań jobasyn talqylaýda Parlament Májilisiniń Tóraǵasy Nurlan Nyǵmatýlınniń basshylyǵymen memlekettik organdar, týrıstik uıymdar ókilderiniń, sarapshylar men qoǵamdyq birlestikterdiń qatysýymen salany damytýdyń ózekti máseleleri boıynsha keńes ótkizilgen.
Keńes qorytyndysy boıynsha depýtattar týrıstik salany damytýdy memlekettik qoldaý sharalaryn aıqyndaýǵa jáne yntalandyrýǵa, ishki jáne kelý týrızmi salasyndaǵy týroperatorlyq qyzmet lıtsenzııasyn habardar etý tártibine aýystyrýdy alyp tastaýǵa jáne lıtsenzııalaý qyzmetiniń osy túrin saqtaýǵa baǵyttalǵan túzetýlerdi engizgen.
Sondaı-aq basym týrıstik aýmaqty basqarý úshin basqarýshy kompanııa qurý jónindegi normany alyp tastaýǵa, erekshe qorǵalatyn tabıǵı aýmaqtar salasyndaǵy zańnamasyna sáıkes týrıstik qyzmet obektilerin salýdy júzege asyrýǵa baǵyttalǵan túzetýlerdi qosqan.
