Májilismender aımaqtarda jas urpaqtyń áleýetin damytý máselesin talqylady
ASTANA. QazAqparat - Májilis depýtattarynyń óńirlerdegi saparlary jalǵasýda. Halyq qalaýlylary Mańǵystaý jáne Soltústik Qazaqstan oblystaryndaǵy otyrystarda jas urpaqty qoldaýǵa erekshe kóńil bóldi. Bul týraly QazAqparat Májilistiń baspasóz qyzmetine silteme jasap habarlaıdy.
Májilistegi «Nur Otan» partııasy depýtattyq fraktsııa músheleri Taras Hıtýov, Káribaı Musyrman, Asylbek Smaǵulov jáne Sáken Ótebaev Mańǵystaý oblysy, Munaıly aýdany Basqudyq aýylyndaǵy «Balalar men jasóspirimderge arnalǵan sport mektebine» bardy. Kezdesýge aýyl aqsaqaldary, balalar, mektep ujymy men qyzmetkerleri qatysty.
Qazirgi ýaqytta mektepte 9-15 jas aralyǵyndaǵy 750 bala 42 sport tobynda jattyǵady. Olarǵa 26 jattyqtyrýshy sabaq beredi. Kezdesý barysynda mekteptiń 2015 jyly salynǵanyn jáne búgingi tańda jyl saıyn sport sektsııalaryna túsetin balalar sanynyń artýyna baılanysty onyń aýmaǵy tarshylyq etetini, qosymsha ashyq jáne jabyq sport alańdary qajet ekendiligi aıtyldy.
Osyǵan oraı, Májilis depýtattary atalǵan máseleniń sheshilýin óz baqylaýlaryna alatynyn jetkizdi.
Májilistiń Halyqaralyq ister, qorǵanys jáne qaýipsizdik komıtetiniń tóraǵasy Muhtar Erman men depýtat Sergeı Zvolskıı Petropavda Oqýshylar saraıynyń qurylys jumysymen tanysty.
Jańa Oqýshylar saraıy 1800 balaǵa eseptelgen. Onyń salyný merzimi osy jyldyń qyrkúıek aıyna josparlanǵan. Nysannyń basty maqsaty - balalardyń jobalaý-zertteý qyzmetin jáne ǵylymı-tehnıkalyq shyǵarmashylyǵyn damytý bolyp tabylady. Oqýshylar saraıynyń bazasynda IT-ortalyǵy jumys isteıtin bolady.
Budan basqa, saraı bazasynda ınnovatsııalyq kovorkıng-aımaǵy bolady. Onda sóılesý bólmeleri, smart ofıster, kompıýterlendirilgen aımaqtar qamtylady. Saraıda kórkemdik-estetıkalyq baǵyttaǵy shyǵarmashylyq aımaǵy da qarastyrylǵan. Onda balalar horeografııa, teatr jáne vokaldyq daǵdylardy úırenedi.
«Oqýshylar saraıy men joǵary tehnologııalyq bazasy bar biregeı IT-ortalyǵy balalar men jastardyń ıntellektýaldy damýynyń oshaǵy bolyp tabylady. Munda ǵylymı jáne shyǵarmashylyq qyzmet úshin eń jaqsy jaǵdaılar jasalady. Memleket basshysy bul týraly óziniń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri»Joldaýynda aıtqan bolatyn», - dedi Májilis depýtaty Muhtar Erman.
Sondaı-aq, depýtat búgingi tańda «Nur Otan» partııasynyń jastarǵa baǵyttalǵan jańa jobalary bar ekenine, ol elimizdegi kóptegen talantty jastardyń óz áleýetin jan-jaqty iske asyrýǵa múmkindik beretinin jetkizdi.
