Májilismender Almatyda qańtar qyrǵynynda zardap shekken kásipkerlermen kezdesti

ALMATY. QazAqparat- Almatyǵa jumys sapary aıasynda QR Parlamenti Májilisiniń depýtattary Aıdos Sarym, Aıgúl Quspan jáne Juldyz Súleımenova qańtar aıyndaǵy oqıǵalar kezinde zardap shekken kásipkerlermen kezdesip, zalaldy óteý boıynsha tólemder men ótemaqyny jedeldetýdiń ózekti máselelerin talqylady, dep habarlaıdy QazAqparat tilshisi.

Zardap shekken kásiporyndardyń biri «DasAutoServise» JShS. Avtoservıs ıesi Kırıl Nagıev 6 jyl boıy avtomobılderdi jóndeýmen jáne avtobólshekterdi satýmen aınalysady jáne munda atalǵan jerdi jalǵa alady.

Olar oryn alǵan jaǵdaıdan keıin jalaqy almaǵan.

«Bizdiń avtoservısimizde klıentterdiń 9-ǵa jýyq kóligi boldy, barlyǵy órtendi. Olar da tekserýden ótip, zalaldy óteýge ótinish beredi. Biz shyǵyn somasyn tek 40 mln teńgege dáleldeı aldyq, ótinim qazir maquldaý kezeńinde. Barlyq qujattar men dıagnostıkalyq jabdyqtardyń da janyp ketkenniń saldarynan dáleldeı almaǵanymyz qanshama», - dedi Kırıl Nagıev.

Jappaı tártipsizdik kezinde avtoservıste bolǵan avtokólik ıeleriniń ótinishteri elektrondyq platformada jeke tirkelgen, olar qaraý barysynda.

Sonymen qatar, jappaı tártipsizdik barysynda 2 kólik urlandy.

Avtoserıs ǵımaratynyń ózine keletin bolsaq, qazirgi ýaqytta ǵımarattyń qoldanystaǵy parametrlerin saqtaı otyryp, qaıta qurýǵa arnalǵan jobalyq-smetalyq qujattama ázirlenýde.

Alaıda ıesi JSQ jáne saraptamalyq qorytyndy úshin qarjylyq turǵyda tóleý múmkindigi joq ekenin jetkizdi.

«Bul jaǵdaıdyń kúrdeliligi nede, munda ıesi bireý, biraq bir bıznes aıasynda 10-nan astam qosalqy jalǵa alýshy jumys isteıdi. Bul keıs boıynsha bizde túsinistik bar – eń bastysy, kásipkerde aldaǵy jospardyń kórinisi paıda boldy. Biz aýdan ákimdigimen keliskenimiz boıynsha búgin-erteń ıesine naqty jospar-keste usynylady: qashan, qaı merzimde, qandaı saraptamalar júrgizý kerektiginde. Biz de muny baqylaýǵa alamyz, qalalyq qyzmetterdiń jumysyn jedeldetetin bolamyz», - dedi májilismen Aıdos Sarym.