Májilismender Aqsýdaǵy kóp balaly otbasylarǵa arnalǵan turǵyn úı qurylysyn nazarǵa aldy

NUR-SULTAN. QazAqparat - Búgin Májilis depýtattary Meıram Pishembaev pen Nurlan Ábdirov jumys sapary barysynda Pavlodar oblysy Aqsý qalasyndaǵy turǵyn úılerdiń qurylys alańyna bardy, dep habarlaıdy QazAqparat tómengi palatanyń baspasóz qyzmetine silteme jasap.

Búginde jeke turǵyn úı qurylysy shaǵyn aýdanynda salynyp jatqan úılerdi 56 otbasy kútýde. Merdigerlerdiń aıtýynsha, barlyq kommýnıkatsııalar: jylý, jaryq, elektr, káriz júıeleri ornatylyp, nysandy osy jyldyń qazan aıynda tapsyrý josparlanǵan.

- Biz, «Nur Otan» partııasy fraktsııasynyń depýtattary, osyndaı nysandardyń baqylaýyna erekshe nazar aýdaratyn bolamyz. Qurylys jumystarynyń barysymen únemi tanysyp, turǵyn úımen qamtamasyz etýdi nazarǵa alamyz. Aqsý qalasy úlgisindegi jumysty elimizdiń basqa óńirlerinde iske asyrǵany jón, - dedi Meıram Pishembaev.

Aıta ketý kerek, jeke turǵyn úı qurylysy aýdanyn abattandyrý úshin jergilikti bılik joldar salyp, shaǵyn jáne orta bıznesti damytý úshin kompanııalardy tartýdy josparlap otyr.

Sonymen qatar, osy kúni Májilis depýtaty Nurlan Dýlatbekov Mańǵystaý oblysyndaǵy atom energetıkalyq kombınatyna bardy.

Eńbek ujymymen kezdesýde depýtat áleýmettik qamsyzdandyrý salasyna toqtalyp, azamattardyń ál-aýqatyn jaqsartýǵa erekshe mán berdi. Birqatar ózekti áleýmettik máseleler kóterilip, aıtylǵan barlyq usynys-pikirler nazarǵa alyndy.