Májilismen U.Sádibekov maqta salasyn damytý úshin qoldanystaǵy zańǵa ózgerster engizýdi surady
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Ulasbek Sádibekov osy máseleni kóterdi.
Depýtattyń aıtýynsha, 2007 jyly «Maqta salasyn damytý týraly» zańnyń qabyldanýy maqta sharýashylyǵy óndirisine, zaýyttyń qarjylyq táýeldiliginen qutylýǵa, ósirgen ónimimen sharýanyń ózi aınalysýyna múmkindik bergen. Tıisinshe maqta shıkizatyna, óndirgen ónimine ádil baǵa jáne kredıttik resýrstar alýǵa jaǵdaılar týǵan. Zań arqyly maqta salasyn damytýdy memlekettik retteý men qoldaýdy qamtamasyz etetin quqyqtyq uıymdastyrý jáne ekonomıkalyq negizder de qalanǵan. Osynyń nátıjesinde, 2006 jyldan bastap 2012 jylǵa deıingi kezeńde maqta salasyn jalpy memlekettik qarjylandyrý 2,7 esege artqan. Osylaısha, maqta salasyn odan ári damytý úshin jaǵdaı jasalǵan bolatyn.
«Alaıda, kelip túsken ótinishterdi taldaý nátıjesi maqta sharýashylyǵy salasynda qalyptasqan júıeli problemalardy kórsetip otyr. Atap aıtsaq, baǵanyń qalyptasýy, memlekettik qoldaý, sondaı-aq bıznesti júrgizý kezindegi qıynshylyqtar barshylyq. Osy máselege oraı, aýyl sharýashylyǵy ónimderin eksporttaýda astyqtan keıingi ekinshi orynda turatyn maqta salasyn damytý maqsatynda qoldanystaǵy zańǵa ózgerster engizýdi suraımyz. Onyń ishinde ázirlenip jatqan «Agrobıznes-2020» baǵdarlamasynda maqta sharýashylyǵyn basymdyqtar qataryna qosýdy, maqta óńdeý kásiporyndarynyń jańa tehnologııalarymen qaıta jabdyqtaý úshin memlekettik qoldaýdy qarastyrýdy usynamyz», - dedi depýtat.
