Májilismen Semeıden shóberesine pıma alyp qaıtty
SEMEI. QazAqparat - Semeıge jumys saparymen QR Parlament Májilisiniń depýtaty Vladıslav Kosarev keldi, dep habarlaıdy QazAqparat.
Qalaǵa jumys sapary barysynda Vladıslav Kosarev «Roza» kıiz basý kombınatyna bardy. 1991 jyly qurylǵan kásiporynnyń ónimderi búginde Qazaqstanda ǵana emes, TMD elderinde de suranysqa ıe. Degenmen bıyl shyǵarylatyn ónim kólemi azaıǵan. «Roza» JShS dırektory Albına Ahmetovanyń aıtýynsha, buǵan shıkizattyń jetkiliksizdigi sebep.
«Kópshiligi maldyń júnin jeke kásipkerlerge ótkizedi. Sebebi, olarǵa tıimdi. Birinshiden baǵasy bizben salystyrǵanda birneshe ese joǵary. Óıtkeni olar tek salyq qana tóleıdi. Al biz jeke seriktestik bolǵannan keıin memlekettik salyqtar men mindetti tólemderdi tóleımiz. Árıne, bul shıkizattyń satyp alý baǵasyna áser etedi»,-deıdi Albına Ahmetova.
Sonymen qatar, ónim kóleminiń tómendeýine óńir sharýa qojalyqtarynyń iri qara mal sanyn arttyrýy sebep bolǵanyn alǵa tartty seriktestik dırektory. Usaq mal sharýashylyǵymen aınalysatyn qojalyqtardyń sany azaıǵan soń, mal júni de az. Sondyqtan usaq mal sharýashylyǵyn damytý úshin qojalyq ıelerine qoldaý kerek ekenin aıtty. Óz kezeginde Vladıslav Kosarev usynys-pikirlerdi eskeretinin jetkizdi.
Degenmen, kásiporyn jurttyń suranysyna, talapqa saı, túrli sándik úlgidegi pımalar men etikter tigýdi jalǵastyrýda. 2014 jyly qaıta jańǵyrtýdan ótken kásiporyn jabdyqtarynyń búginde 90%-y jańartylǵan. Nátıjesinde sapaly, zamanaýı erler men áıelderge, balalarǵa arnalǵan etikter men pımanyń túr-túri tigilip, satylymǵa shyǵarylyp jatyr.
Kásiporynnyń tynys-tirshiligimen tanysqan Vladıslav Kosarev ónimniń joǵarǵy sapasyn baǵalaı kele, óziniń shóberesine pıma satyp aldy.
