Májilismen Oralda Ulttyq ulan jaýyngerlerimen kezdesti
ORAL. QazAqparat - Batys Qazaqstan oblysynda jumys saparymen júrgen Májilis depýtaty, tarıh ǵylymdarynyń doktory, general-leıtenant Abaı Tasbolatov Oralda Ulttyq ulan jaýyngerlerimen kezdesti, dep habarlaıdy «QazAqparat» tilshisi.
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, halyq qalaýlysy aldymen óńirlik qolbasshylyq basqarmasy men 5517-áskerı bóliminiń shtabynda, jaýyngerlik dańq mýzeıinde boldy. Sodan keıin «Batys» óńirlik qolbasshysy, general-maıor Álibek Serálıev májilismendi áskerı bólimniń oqý úderisimen, kúndelikti tynys-tirshiligimen tanystyrdy.
Májilis depýtaty áskerı qyzmetshilerge elimizdiń 2050 jylǵa deıingi damýynyń strategııalyq baǵdarlamasynyń negizgi baǵyttary, zańshyǵarýshylyq qyzmet barysynda atqarylǵan jumystar jóninde áńgimelep berdi. Sonyń ishinde qazir Májiliste qaralyp jatqan áskerı qyzmetshilerge arnalǵan turǵyn úı tujyrymdamasy týraly da aıtyldy.
«Qazirgi tańda Ulttyq ulan jaýyngerleri naqty mindetti oryndaýda. Olar kún saıyn, aýa raıyna qaramastan, qolyna qarý ustap, el tynyshtyǵyn, mańyzdy nysandardy kúzetýde. Bul oqý-jattyǵý emes, sondyqtan áskerı qyzmetshiler barlyq baılanys jáne kólik quraldarymen tolyq qamtamasyz etilýi tıis. Memleket basshysy tarapynan Ulttyq ulanǵa udaıy kóńil bólinip keledi. Beıbit kúnde erlik kórsetip, qarýlas joldastary men qarapaıym turǵyndardy qorǵap qalyp jatqandar az emes. Olardyń ómirine ár sát saıyn qaýip tónedi. Sol sebepti áskerı qyzmetshilerdiń áleýmettik jaǵynan qorǵalýyn da esten shyǵarmaý kerek», - dedi Abaı Tasbolatov.
