Májilismen kúmándi dári-dármekterdiń «qara tizimin» jasaýdy usyndy
ASTANA. QazAqparat - Resmı medıtsına aqparat keńistiginde alaıaqtarǵa ese jiberip otyr. Mundaı oıyn Parlament Májilisiniń jalpy otyrysynda Densaýlyq saqtaý mınıstri Eljan Birtanovqa saýal joldaǵan depýtat Turǵyn Syzdyqov bildirdi, dep habarlaıdy «QazAqparat» HAA tilshisi.
«Buqaralyq aqparat quraldarynda, ásirese áleýmettik jelilerde kóptegen aýrýlardy demde jazatyn jańa preparattar týraly jarnama tolyp tur. Otandyq jáne álemdik medıtsınadaǵy tanymal tulǵalardyń oı-pikirlerimen nyqtala túsken jarnamalar olardy teńdesi joq, sýpertıimdi preparat retinde kórsetedi», - dep atap ótti Turǵyn Syzdyqov.
Májilismen Prezıdent ult densaýlyǵyn qalyptastyrýda azamattardyń óz-ózine baǵa berýin jáne azamattardyń qoǵamdaǵy rólin aqparattandyrýdy jaqsartý jáne salaýatty ómir saltynyń tıimdiligin arttyrý arqyly tapsyrǵanyn eske saldy. Sondyqtan, bul problemaǵa mán berý qajet. Resmı medıtsına men BAQ-tyń bedeldi pikiri máseleni birjaqty etýde sheshýshi ról atqarýy tıis.
Turǵyn Syzdyqov Qazaqstannyń resmı medıtsınasy aqparattyq keńistiktiń aýqymdy bóligin kúmándi jarnama berýshiler men emshilerge berip qoıǵanyn aıtady. Al olardyń arasynda alaıaqtar kóp. Bul retsizdik óz kezeginde resmı medıtsınany belgili bir mólsherde ysyryp otyr. Depýtat resmı medıtsına ókilderiniń bul ahýalǵa sabyrmen qarap otyrǵanyn da túsinbeıtinin bildirdi.
Halyq qalaýlysy Densaýlyq saqtaý mınıstrligi mundaı jarnamalarǵa qalaı qaraıtynyn, jarnamadaǵy preparattar sapasynyń talapqa saı kelý-kelmeýin surady. Sondaı-aq aqparattyq keńistiktiń qaýipsizdigin qamtamasyz etý, BAQ týraly zańnamany saqtaý, qate jarnama úshin jaýapkershilikke tartý jumystary vedomstvoaralyq turǵyda qalaı úılestirilip jatqandyǵyna qatysty saýaldar legi Densaýlyq saqtaý mınıstri Eljan Birtanovtyń atyna joldandy.
Depýtattyń pikirinshe, adamdardyń densaýlyǵyna qaýipti degen preparattardyń «qara tizimin» qurýǵa bolady. Sonymen birge, májilismen dári-dármekterdiń satylýynda tártip ornatý úshin Densaýlyq saqtaý mınıstrligi qandaı sharalardy qolǵa alǵanyn bilgisi keledi.
