Májilismen Qazaqstandaǵy ishki týrızmniń damýyn shektep turǵan 5 kedergini atady
ASTANA. QazAqparat - Qazaqstandaǵy ishki týrızmniń tabysy eldegi Jalpy ishki ónimniń 1 paıyzdyq kórsetkishine de jetpeıdi. Bul týraly QR Parlament Májilisiniń depýtaty Shavhat Ótemisov málim etti, dep habarlaıdy «QazAqparat» HAA tilshisi.
Parlament Májilisiniń depýtaty «Nur Otan» partııasy janyndaǵy Áleýmettik keńes pen QR Parlamenti Májilisiniń Áleýmettik-mádenı damý komıtetiniń birlesken otyrysynda ishki týrızmniń ótkir máselelerin atady.
«Biz búgin ekonomıkany damytýǵa áleýetti draıver retinde týrızmniń múmkindikterin elimizde paıdalanylmaıtynyn atap ótýimiz qajet. Bul týrızmniń barlyq túrleri, sonyń ishinde ishki týrızmge de qatysty... Tek birneshe sanǵa toqtalyp óteıin. Osy salanyń Qazaqstandaǵy JІÓ-degi úlesi 1,6 paıyzdy, al ishki týrızmniń kórsetkishi 1 paıyzǵa da jeter-jetpes. Al álemdik JІÓ-de týrızm 9 paıyzdy qurap, álem boıynsha osy salada árbir 11-shi adam jumys atqarady», - deıdi Parlament Májilisiniń depýtaty.
Onyń aıtýynsha, týrıstik salany damytýǵa mańyz berý jaıly Elbasynyń Qazaqstan halqyna arnaǵan «Qazaqstannyń úshinshi jańǵyrýy: jahandyq básekege qabilettilik» Joldaýynda aıtylǵan. Sonymen birge, «100 naqty qadamdaǵy» 57-shi, 86-shy jáne 87-shi qadamdary da týrızmdi damytýǵa arnalǵan.
«Týrızmdi damytýǵa arnalǵan birshama jumystyń atqarylǵanyn da atap ótkimiz keledi. Jaqynda ǵana «Qazaq týrızm» sekildi ulttyq kompanııa quryldy. Ýákiletti organdarmen salany damytýǵa arnalǵan tujyrymdama qabyldandy. Kóptegen ınstıtýtsıonaldy jumystar júrgizilip keledi. Qarjylyq resýrstar bar. Olar ulttyq týrıstik ónimniń qurylýyna órleýine járdem berýi kerek», - deıdi depýtat.
Shavhat Ótemisov ishki týrızmniń damýyna «EKSPO» kórmesi aıqyn serpin bergenimen, áli de biraz máseleler qordalanyp turǵanyn jasyrmady.
«Másele, shyn máninde, az emes. Máselelerdiń ishinde mynalar ǵana betinde jatyr. Olar: týrızmdi damytý úshin tıisti ınfraqurylymnyń joqtyǵy, týrızm ónimderdi qurý boıynsha standarttardyń joqtyǵy, týrındýstrııadaǵy bilikti kadrlardyń azdyǵy, týrıstik qyzmetterdiń negizsiz qymbattyǵy men týrıstik qyzmettiń zańnamalyq qamtamasyz etýdegi problemalyq suraqtary», - deıdi depýtat.
Shavhat Ótemisov búgingi talqylaý Qazaqstandaǵy týrıstik áleýettiń damýyn ustap turǵan barlyq problemalardyń tizgini anyqtaýǵa múmkindik beretinine senim bildirdi.
«Bul óz kezeginde Qazaqstandaǵy ishki týrızmniń tıimdi júıesin qurýǵa baǵyttalǵan memlekettik organdarmen qatar, týrıstik qaýymdastyqtardyń ary qaraıǵy áreketteriniń negizgi vektorlaryn anyqtaýǵa óz úlesin qosady degen úmittemin», - deıdi depýtat.
Aıta ketsek, Parlament Májilisindegi «Іshki týrızmniń jaı-kúıi: problemalary men keleshegi týraly» otyrysyna Májilis depýtattary men Mádenıet jáne sport, Investıtsııalar jáne damý, Aqparat jáne kommýnıkatsııalar mınıstrlikteriniń ókilderi qatysýda. Birlesken otyrysty Qazaqstandaǵy ishki týrızmdi damytýdyń jaı-kúıin zerdeleý jáne máselelerdi talqylaý maqsatynda ótkizilip otyr.
