Májilismen ındýstrııalyq aımaqtarǵa bólinetin qarajatty qatań baqylaýdy usyndy
ASTANA. QazAqparat - Indýstrııalyq aımaqtar qurylysyna baǵyttalatyn bıýdjet qarajatyn paıdalaný tıimdiligine qatań baqylaý jasaý kerek.
Mundaı usynysty búgin Májilistegi Úkimet saǵatynda depýtat Nurtaı Sabılıanov jasady, dep habarlaıdy QazAqparat.
«Elimizde básekege qabiletti jańa óndirister qurý jáne eksportqa baǵyttalǵan ónim shyǵarý úshin 10 arnaıy ekonomıkalyq aımaq jumys isteıdi. 2000-2016 jyldar kezeńinde arnaıy ekonomıkalyq aımaqtar qurýǵa jáne olardyń ınfraqurylymyn salýǵa 265 mlrd. teńge bıýdjet qarajaty jumsaldy. Buǵan qosa, arnaıy ekonomıkalyq aımaqqa qatysýshylar úshin jeńildikter men preferentsııalar kózdelgen. Máselen, Qarjy mınıstrliginiń derekteri boıynsha, bıznes sýbektilerine arnaıy ekonomıkalyq aımaqqa qatysýshylarǵa berilgen jeńildikter men preferentsııalar esebinen bıýdjet shyǵyny 2016 jyly 55,6 mlrd.teńgeni qurady. Alaıda, arnaıy ekonomıkalyq aımaqtarǵa tirkelgen 307 qatysýshynyń ishinde 2016 jyly 94 kásiporyn jeke tabys salyǵy boıynsha «nóldik» eseptilik tapsyrǵan. Qalǵan 213 kásiporyn bıýdjetke nebári 3,9 mlrd. teńge jeke tabys salyǵyn jáne 13,5 mlrd. teńge korporatıvtik tabys salyǵyn tólegen», - dep atap ótti Sabılıanov.
Demek, depýtattyń aıtýynsha, salynǵan qarajattyń qaıtarymy bolmaǵan jáne arnaıy ekonomıkalyq aımaqtardy qurýdan mýltıplıkatıvtik áserge ázir qol jetkizilmegen. Sondyqtan ýákiletti organ arnaıy ekonomıkalyq aımaqtyń tolyqtyrylýyn jáne oǵan ınvestorlardy tartýdy qamtamasyz etýge tıis.
«Osyǵan baılanysty, ındýstrııalyq aımaqtar qurylysyna baǵyttalatyn bıýdjet qarajatyn da paıdalaný tıimdiligine qatań baqylaý jasaý qajet. Memleket basshysynyń tapsyrmalaryn iske asyrý maqsatynda qoldanystaǵy salyqtyq jeńildikterdi ońtaılandyrý mańyzdy. Salyqtyq jeńildikter jańa jumys oryndary ashylyp jatqan, ishki naryqty toltyrý ári eldiń eksporttyq áleýetin ulǵaıtý úshin básekege qabiletti ónim shyǵarylatyn salalarǵa berilýge tıis», - dedi ol.
