Májilismen blokpostta aýyl sharýashylyǵy ónimin tasymaldaýshylardy jeke dáliz arqyly ótkizýdi usyndy
NUR-SULTAN. QazAqparat – Parlament Májilisiniń depýtaty Nurjan Áltaev tótenshe jaǵdaıǵa baılanysty aýyl sharýashylyǵy ónimderin ótkize almaı otyrǵan fermerlerdiń máselesin kóterip, Úkimet basshysyna depýtattyq saýal joldady, dep habarlaıdy QazAqparat tilshisi.
«Qazaqstanda tótenshe jaǵdaıdyń engizilýine baılanysty agroónerkásip kesheni sýbektileriniń qozǵalysy, tehnıkalar men aýyl sharýashylyǵy jumysshylarynyń dıslokatsııasy, aýyl sharýashylyǵy taýarlaryn tasymaldaý men satýda edáýir qıyndyq týyndap tur. Qazaqstan Prezıdentiniń Tótenshe jaǵdaı engizýge baılanysty Jarlyǵyna sáıkes keıbir aımaqta adamdar men jeke kólikterdiń, júk kólikteri men taýarlardyń qozǵalysyna shekteý engizilgen. Sonymen qatar Aýyl sharýashylyǵy mınıstriniń jeke buıryǵyna sáıkes 2020 jyldyń 2 sáýirinde aýyl sharýashylyǵy taýarlarynyń keıbir túrin syrtqa shyǵarýǵa jáne shyǵarýdy shekteý tártibi kúshine engen», - dedi Nurjan Áltaev Parlament Májilisiniń jalpy otyrysynda.
Depýtattyń aıtýyna qaraǵanda adamdardyń, aımaqtarda aýyl sharýashylyǵy tehnıkalarynyń qozǵalysyna, taýarlardy tasymaldaý men satýǵa ruqsat alý tártibiniń ashyq protsedýrasy joq. Osynyń saldarynan jergilikti atqarýshy jáne quqyq qorǵaýshy organdar júk tasymalyn ótkizý tártibin ózinshe túsinip, keıbir jerde shekten shyqqan áreketter bolyp jatyr.
«Máselen Jambyl men Almaty oblysynyń shekarasynda aýyl sharýashylyǵy ónimi tıelgen fýralar blokposttarda táýlik boıy tur. Olardyń kózdegen orynǵa tez ári kedergisiz jetý múmkindigi qarastyrylmaǵan. Qyrǵyz Respýblıkasymen shekarada da eksportqa shyǵaratyn ónimderdi tıegen kólikterdiń keptelisi paıda bolǵan. Al aýyl sharýashylyǵy ónimderin ornyna tez jetkizbese buzylyp ketedi. Onyń ústine sarymsaq, qyryqqabat, sábizdi eksportqa shyǵarýdy toqtatyp tastaýdyń ózi oı týyndatady. Qazir ońtústik aımaqtarda tez buzylyp ketetin 800 myń tonnaǵa jýyq aýyl sharýashylyǵy ónimi jınalyp qalǵan. Qazaqstanda ol ónimderdi tutyný deńgeıi 10 ese az. ıAǵnı, ónim kerekti mólsherden artyq óndirilgen. Qazaqstannyń ońtústigindegi fermerler el ishinde suranystyń bolmaýynan buzylǵan ónimdi laqtyrýǵa májbúr», - deıdi ol.
Sol sebepti depýtat Úkimetten adamdar men taýarlardyń qozǵalysyn retteıtin biryńǵaı tártip engizýdi, maquldaý tártibiniń bárin onlaın rejımge aýystyrýdy, tez buzylatyn aýyl sharýashylyǵy ónimderin kirgizýge qoıylǵan shekteýlerdi alyp tastaýdy, blokposttarda júk kólikteri úshin jeke dáliz engizýdi surap otyr.
