Májilismen AShM damý kórsetkishine kúmán keltirdi
ASTANA. QazAqparat - Parlament Májilisiniń depýtaty Roman Kım QR Aýyl sharýashylyǵy mınıstrligi keltirgen damý kórsetkishterine kúmán keltirdi. Depýtat mınıstrlik keltirgen málimetterdiń qaǵaz júzindegi kórsetkishteriniń túsiniksizdigin aıtty, dep habarlaıdy «QazAqparat» HAA tilshisi.
Elimizdegi jaıylym jerlerdiń ahýaly talqylanǵan «Nur Otan» partııasynyń komıssııa otyrysynda Roman Kım QR Aýyl sharýashylyǵy mınıstriniń Erlan Nysanbavqa suraq qoıdy. Onyń aıtýynsha, «Agrobıznes-2020» baǵdarlamasy boıynsha bólinetin qarjy qysqarǵan, al eldegi jaıylymdardyń jaǵdaıy da máz emes.
«Jalpy, úı qulap bara jatsa, esti adam irgetasty kúsheıtedi emes pe?! Al biz qabyrǵany boıaımyz kep. Resmı aqparatqa súıensek, 27 mln gektar jaıylym jerdi qurtyp aldyq. Bul - eldi mekenderdiń mańyndaǵy jerdiń eń shuraılysy edi. Aýyldan 20 shaqyrymdaǵy jaıylymǵa eshkim qyzyqpaıdy. Jerimizdiń 30 paıyzy qunaryn joǵaltty. Aýyl sharýashylyǵyna tıesili jerler jyl sanap tozyp barady. Resmı derekterge súıensek, biz 1 gektar jerge 4 keli tyńaıtqyshtan keledi. Al AShM-niń Damý kartasyndaǵy kórsetkishke qaraǵanda, ónim shyǵymy eselep artqan. Buǵan qosa «Agrobıznes-2020» baǵdarlamasy boıynsha 3,2 trln teńge bólinedi degenmen tıisti qarjy azaıyp ketti. Osy jaǵdaılarǵa qaramastan, eginniń shyǵymy da, aýyl sharýashylyǵynyń ónimdiligi de artyp barady. Bul qalaı bolǵany?» - deıdi Májilis depýtaty.
Óz kezeginde QR Aýyl sharýashylyǵy vıtse-mınıstri Erlan Nysanbaev keńsharlar men ujymsharlar taraǵaly qanshama sýarmaly jerlerdiń qurtylǵanyn aıtty.
«Sondyqtan, biz keshendi túrde aýyl sharýashylyǵy ónimderin óndirýshilerdiń menshiginde turǵan 610 myń ga sýarmaly jerdi arttyrýdy kózdep otyrmyz. Ekinshiden, biz barlyq óńirler boıynsha jyrtylǵan, biraq paıdalanylmaı jatqan jerlerdi tekserip jatyrmyz. Biz 1,9 mln ga jerdi aınalymǵa engizip, ákimdiktermen jumys júrgizdik», - deıdi vıtse-mınıstr.
Onyń aıtýynsha, barlyq eldi mekenderde qazirgi ýaqytta tórt túlik sany artyp keledi. Jeke sharýashylyqtardyń maly ósip kele jatqanyn eskere otyryp, mınıstrlik ókili sharýashylyqpen keńinen aınalysatyn fermerlerdiń mártebesin belgileıtin ýaqyt kelgenin jetkizdi.
«Biz búgingi tańda jaıylym boıynsha óńirler men eldi mekenniń naqty shekaralyq suraqtary boıynsha jumys júrgizip jatyrmyz. Ujymdyq qoldanysqa tıesili jerlerdiń bári jerge ıe bolý quqyǵy boıynsha, ıaǵnı jeke adamǵa, Qazaqstannyń azamattaryna berilip ketken. Osy sebepti, jeke sharýashylyqtaǵy (aýyl turǵyndarynyń - avt) adamdardyń aýyl mańynda jaıylymdary azaıyp qalǵan», - deıdi ol.
Vıtse-mınıstr sonymen birge, mınıstrlik búgingi kúni zańnamalyq turǵyda jerdiń tıimdi paıdalanylýy boıynsha jumys júrgizilip jatqanyn, mal jáne ósimdik sharýashylyǵy, eginshilik, tyńaıtqyshtar, kólik quraý, agrarlyq tehnıkalardy damytý boıynsha tıisti jumystar qolǵa alynǵanyn atap ótti.
«Sondyqtan, aýyl sharýashylyǵy damymaı jatyr dep aıtpas edim. Qazaq «kósh júre túzeler» deıdi. Alda jumys kóp. Aýyl sharýashylyǵyn damytý boıynsha jumystar jalǵasa beredi», - deıdi Erlan Nysanbaev.
