Májilismen «Alataý» ITP-nyń jumysyn synǵa aldy
ASTANA. QazAqparat - QR Parlament Májilisinde arnaıy ekonomıkalyq jáne ındýstrııaldyq aımaqtarǵa arnalǵan zań jobasyn tanystyryldy. Sol kezde depýtat Baqtııar Máken «Alataý» parkiniń máselesin taǵy kóterdi, dep xabarlaıdy QazAqparat tilshisi.
«Sońǵy on jyl boıy «Alataý» ınnovatsııalyq texnologııalyq parkinen jańalyq shyqqan joq. Eshqandaı nátıje kórinbeıdi. Qazir arnaıy jumys toby quryldy dep jatyr. Degenmen, búgingi zań jobasy qabyldansa, jaýapkershilikti kúsheıtý kerek dep oılaımyn. Ol jerde otyrǵan adamdardy qýý qajet. Óıtkeni olar múldem jumys istemeıdi!», - dedi B.Máken. Osy oraıda depýtat Almatydaǵy jumysyn eske aldy. Onyń aıtýynsha, sol kezdiń ózinde «Alataý» ınnovatsııalyq texnologııalyq parki kózboıaýshylyqpen aınalysty. «Áli esimde, ádemi stendterdi kórsetip, biraz jetistikterge jettik dep maqtanady. Mine, ınnovatsııalar deıdi. Teledıdardan da kórsetip jatady. Artynan eshqandaı jaýapkershilik bolmaıdy», - dep atap kórsetti B.Máken.
QR Investıtsııalar jáne damý vıtse-mınıstri Erlan Qaıyrov «Alataý» ITP-nyń qyzmetin túsindirip berýge tyrysty. «Bul jerde bir nárseni túsiný kerek, ınnovatsııalyq texnologııalar parkiniń orny bólek. Oǵan qatysty arnaıy zań da bar. Degenmen, ınnovatsııalar aspannan túspeıdi. Ony iske asyrý úshin biraz ýaqyt qajet. Bir ınnovatsııalyq ónimdi óndiriske engizýge uzaq ýaqyt ketedi. Negizi, «Alataý» ITP-dan shyqqan ınnovatsııalar bar. Biz barlyq aqparatty usynýǵa daıynbyz», - dedi E.Qaıyrov.
Aıta keteıik, Indýstrıalızatsııa kúnine arnalǵan jalpyhalyqtyq telekópir kezinde QR Prezıdenti Nursultan Nazarbaev "Alataý" texnoparkin tekserýdi tapsyrǵan bolatyn.
