Májiliske notarıýstar men advokattardyń qyzmetterin jetildirýdi qarastyratyn zań jobasy engiziledi
ASTANA. Qańtardyń 16-sy. QazAqparat /Ernur Aqanbaı/ - 2010 jyldyń birinshi toqsanynda QR Parlamentiniń Májilisine notarıýstar men advokattardyń qyzmetterin jetildirýdi qarastyratyn zań jobasy engiziletin bolady. Bul týraly búgin Ádilet mınıstrliginiń alqa májilisinde mınıstr Rashıd Túsipbekov málim etti,
dep habarlaıdy QazAqparat.
Onyń sózine qaraǵanda, QR Prezıdenti janynda Quqyqtyq saıasat jónindegi keńes mınıstrliktiń notarıat pen advokatýranyń qyzmetin jetildirý týraly usynysyn qoldaǵan. Usynylyp otyrǵan ózgeristerdiń negizgi maqsaty - halyqty qol jetimdi quqyqtyq kómekpen qamtamasyz etý maqatynda notarıýstar men advokattardyń qyzmetterin jetildirý bolyp tabylady. Atap aıtqanda, zań jobasynda halyqaralyq standarttarǵa sáıkes, notarıattyq jáne advokattyq qyzmetti lıtsenzııalaý protsedýrasyn qaıta qaraý usynylyp otyr. «Notarıýsty dıslokatsııalaý ornyn kvotalaý jáne bólý júıesi kóptegen narazylyq týyndatady. Osy másele boıynsha Memleket basshysymen bolǵan «tikeleı jelige» kóptegen suraqtar tústi. Osyǵan baılanysty notarıaldyq qyzmetti iske asyrýdy, halyqtyń sanyn jáne óńirlerdiń ózge de erekshelikterin eskere otyryp, kvotalaý ınstıtýtyn joıý qarastyrylyp otyr», dedi mınıstr.
Onyń sózine qaraǵanda, okrýgta notarıýstardyń eń az sany bekitiletin bolady. Bos oryn paıda bolyp, ony jeke notarıýs toltyrmaǵan jaǵdaıda, ádilet organdary ol aýmaqqa memlekettik notarıýsty engizýge mindetti. Budan bólek, jobada notarıýsqa úmitkerlerge qoıylatyn talapty qatańdatý jáne osy saladaǵy memlekettik baqylaýdy kúsheıtý josparlanyp otyr.
