Májiliske kózqarasy ártúrli saıası ustanymdaǵy kúshter keldi – Prezıdent

ASTANA. QazAqparat – Májiliske kózqarasy ártúrli saıası ustanymdaǵy kúshter keldi. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Saılaý naýqany kezinde kóptegen oryndy syn, baıypty usynys aıtyldy. Biz aıtylǵan salmaqty usynystardy mindetti túrde zerdeleımiz. Báseke joǵary bolǵandyqtan, saılaý nátıjesin aldyn-ala boljaý múmkin emes boldy. Onyń qorytyndysy elimizdiń naǵyz kóppartııaly memleketke aınalý jolynda mańyzdy qadam jasaǵanyn kórsetti. Memleket basshysy retinde aıtarym, Májiliske kózqarasy ártúrli saıası ustanymdaǵy kúshter keldi dep esepteımin», - dedi Prezıdent.

Memleket basshysy alǵash ret uzaq jyl boıy oppozıtsııada bolǵan partııa Parlamentke ótkenin de atap ótti.

«Biz osynyń bárine aýqymdy saıası reformanyń arqasynda qol jetkizdik. Partııalardy tirkeý máselesin retteıtin zańnamanyń ózgerýi de buǵan septigin tıgizdi. Endi partııalar elimizdiń bolashaǵyna zor yqpal etetin saıası úderistiń basy-qasynda júretin bolady. Májiliske bir mandatty okrýgten de depýtattar saılandy. ıAǵnı, Parlamentke túrli áleýmettik toptan shyqqan ókilderdiń kelýine jol ashyldy. Sondaı-aq, uzaq jyldan beri alǵash ret ózin-ózi usynǵan úmitkerler depýtat atandy. Birqatar azamat partııa atynan shyqqan úmitkerlerdi tartysty básekede jeńip shyqty. Osylaısha, elimizde demokratııa dástúri jańa deńgeıge kóterilip, nyǵaıa tústi. Saıası kúshterdiń bárine birdeı múmkindik beriletinine azamattardyń senimi artty», - dedi Qasym-Jomart Toqaev.