Májiliske az mandat alsaq, depýtat bolýdan bas tartamyn – Ermuhamet Ertisbaev

ASTANA. QazAqparat – Májiliske az mandat alsaq, depýtat bolýdan bas tartamyn. Bul týraly Qazaqstan halyq partııasynyń tóraǵasy Ermuhamet Ertisbaev aıtty, dep habarlaıdy QazAqparat tilshisi.

«Kóptegen jýrnalıst, partııalastarym «Májiliske barasyz ba?» dep saýal qoıyp júr. Shynyndy aıtaıyn, eger biz 35-40 depýtat ornyn jeńip alar bolsaq, onda, árıne, ıdeıalarymyz, baǵdarlamalarymyz, osynaý minberden aıtylǵan barlyq dúnıemiz qysqa ǵana ýaqyttyń ishinde júzege asýy úshin – baramyn», - dedi Ermuhamet Ertisbaev Qazaqstan halyq partııasynyń kezekten tys HHІІІ sezinde.

Sonymen qatar ol saıası naýqanda túrli jaǵdaı oryn alýy múmkin ekendigine nazar aýdartty.

«Eger fraktsııa shaǵyn, 10, 12, 15 adamnan jasaqtalsa, onda ornymdy tizimdegi basqa adamǵa beremin. Al ózim partııamyzdy qalyptastyrý jáne damytýmen aınalysamyn. Qalǵan ómirimdi elimizde myqty áleýmettik-demokratııalyq halyq partııasynyń bolýyna arnaǵym keledi», - dedi ol.