Májilis zııatkerlik menshik salasyn retteıtin zań jobasy boıynsha Senatpen kelisti
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine zııatkerlik menshik salasyn quqyqtyq retteý máseleleri boıynsha ózgerister men tolyqtyrýlar engizý týraly» zań jobasyna Senat engizgen túzetýlerdi qarady.
Atalǵan zań jobasynyń maqsaty zııatkerlik menshik nysanynyń tirkelý rásimin ońaılatý jáne quqyqtyq olqylyqtardy joıý, sondaı-aq zııatkerlik menshik salasynda ákimshilik kedergi keltiretin normalardy alyp tastaý bolyp tabylady. Bul rette avtorlyq quqyq salasynda engiziletin túzetýler ujymdyq uıymdardyń qyzmetin naqtylaýǵa, osy uıymdar qyzmetin aıqyndaý men tıimdiligin qamtamasyz etýge baǵyttalady.
Sonymen qatar zań jobasynda ujymdyq uıymdar tarapynan asyra paıdalanýdy joıý sharalary kózdeledi. Máselen, uıymnyń syıaqyny jınaý, bólý jáne tóleý boıynsha óziniń naqty shyǵystaryn óteýge jınalǵan syıaqydan ustalatyn somanyń shekti paıyzyn belgileý qarastyrylǵan. Sondaı-aq halyqaralyq tájirıbeni eskere otyryp, ony jınalǵan syıaqy somasynyń 30 paıyzynan aspaıtyn mólsherinde belgileý usynylyp otyr. Budan bólek, naqty avtorlar men oryndaýshylarǵa bólingen jáne aýdarylǵan, jınalyp qalǵan syıaqylardy ujymdyq uıymdardyń shotynda saqtaý belgilenedi.
Budan bólek, zań jobasynda ónertabysqa arnalǵan patentke uqsastyǵy boıynsha selektsııalyq jetistikke arnalǵan patentti kúshinde qaldyrý úshin tólem jasaý merzimin qalpyna keltirýge múmkindik beretin norma kózdelgen.
Talqylaý barysynda Senat birqatar túzetý usynǵan bolatyn. Májilis depýtaty Ońalsyn Jumabekovtyń pikirinshe, bul túzetýler zań jobasynyń tujyrymdamalyq erejelerin buzbaıdy. Tolyqtyrýlardyń basym bóligi redaktsııalyq naqtylaý sıpatynda bolyp tabylady.
Osyǵan oraı, Májilis Senat engizgen túzetýlerge kelisimin berdi.
