Májilis zııatkerlik menshik quqyqtaryn qorǵaý salasyndaǵy kelisimdi maquldady
ASTANA. 25 mamyr. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Zııatkerlik menshik quqyqtaryn qorǵaý men saqtaý salasyndaǵy biryńǵaı retteý qaǵıdattary týraly kelisimdi ratıfıkatsııalaý týraly» zań jobasyn maquldady.
QR Ádilet mınıstriniń orynbasary Ámirhan Amanbaevtyń aıtýynsha, zııatkerlik menshik quqyqtaryn saqtaý jáne qorǵaý salasyndaǵy biryńǵaı retteý qaǵıdattary týraly kelisim 2010 jylǵy 9 jeltoqsanda Sankt-Peterborda jasaldy. Bul rette Belarýs Respýblıkasy, Qazaqstan Respýblıkasy jáne Reseı Federatsııasy Taraptardyń ulttyq zańnamasymen qorǵalatyn zııatkerlik qyzmettiń nátıjelerin jáne taýarlardy, jumystardy jáne qyzmetterdi daralandyrý quraldaryn saqtaý jáne qorǵaý salasyndaǵy retteý qaǵıdattaryn birizdendirý maqsatynda Kelisimge qol qoıylǵan bolatyn. Kelisimge sáıkes árbir Tarap Keden odaǵynyń biryńǵaı keden aýmaǵynda kontrafaktili taýarlar aınalymynyń jolyn kesýdi tıimdi qamtamasyz etetin zańnamalyq tártip sharalaryn, sondaı-aq Internet jelisinde zııatkerlik menshik quqyqtarynyń buzylýyna qarsy is-qımyl jóninde biryńǵaı sharalardy kózdeıdi. Budan bólek, Taraptar memleketteriniń vedomstvolary arasynda zııatkerlik menshikti saqtaý jáne qorǵaý salasynda úılestirý jáne aqparattyq-tehnıkalyq yntymaqtastyq jónindegi fýnktsııalardy júzege asyrý maqsatynda turaqty negizde turaqty jumys isteıtin ınstıtýtsıonaldyq tetikti - Biryńǵaı ekonomıkalyq keńistiktiń zııatkerlik menshik jónindegi úılestirý keńesin qurý kózdelýde.
Májilis maquldaǵan zań jobasy Parlament Senatyna jiberiledi.
