Májilis jumyldyrý daıyndyǵy máselelerine arnalǵan zań jobasyn maquldady
Ulttyq ekonomıka mınıstri Erbolat Dosaevtyń aıtýynsha, Qazaqstan Respýblıkasynyń qoldanystaǵy áskerı doktrınasynda jumyldyrý daıyndyǵynyń birqatar negizgi mindetteri aıqyndalǵan. «Birinshiden, memlekettik organdardyń, sondaı-aq jumyldyrý tapsyrysy bar uıymdardyń daıyndyǵy júıesin jetildirý. Ekinshiden, memlekettiń jumyldyrý ázirligin arttyrý. Jumyldyrý daıyndyǵynyń negizgi mindetteriniń biri jumyldyrý daıyndyǵy men jumyldyrý salasyndaǵy normatıvtik-quqyqtyq bazany jetildirý bolyp tabylady. Osy maqsatty iske asyrý úshin mınıstrlik memlekettik organdarmen birlesip osy zań jobasyn ázirledi», dedi Ulttyq ekonomıka mınıstri. Onyń aıtýyna qaraǵanda, zań jobasynda «memlekettik organdardyń jumyldyrý jospary», «ákimshilik aýmaqtaǵy jumyldyrý jospary» degen uǵymdar bekitý bóligine ózgerister engizildi. Sonymen qatar, qujatta «taýarlar óndirý, jumystardy oryndaý jáne qyzmetter kórsetýdiń tıisti kezeńge arnalǵan jospary» degen uǵymdar bóligine ózgerister engizilip otyr.
Mınıstrdiń sózine qaraǵanda, qoldanystaǵy zańnamaǵa sáıkes, Úkimet jumyldyrý daıyndyǵynyń áskerı-ekonomıkalyq jáne komandalyq-shtabtyq oqý jattyǵýynyń is-sharalaryn jáne Qarýly kúshterdiń, basqa da áskerı qurylymdardyń, arnaýly memlekettik organdardyń jumyldyrý sharalaryn uıymdastyrady. «Іs júzinde jumyldyrý daıyndyǵy salasyndaǵy ýákiletti organ 2006 jyldan beri jyl saıyn memlekettik organdarmen Úkimet bekitken oqý jattyǵýlardy júzege asyryp keledi. Osyǵan oraı, mundaı oqý jattyǵý jumystaryn júrgizý boınysha ýákiletti organnyń quzyreti keńeıtiletin bolady», - dedi mınıstr Erbolat Dosaev. Májilis maquldaǵan zań jobasy Senatqa joldanady.