Májilis jer zańnamasyna túzetýlerge qatysty zań jobasyn maquldady
Zań jobasy Memleket basshysynyń tapsyrmasyn oryndaý maqsatynda jáne jer qatynastary salasyndaǵy negizgi problemalyq máselelerdi talqylaý ári olar boıynsha usynymdar ázirleý úshin arnaıy qurylǵan Jer reformasy jónindegi komıssııa qyzmetiniń qorytyndysy boıynsha ázirlendi.
«Atap aıtqanda, otandyq jer paıdalanýshylar úshin jalǵa berý ınstıtýtyn saqtaý týraly jáne qazaqstandyqtarǵa aýyl sharýashylyǵy jerlerin jekemenshikke berý jónindegi Jer kodeksi normalarynyń qoldanysyna moratorııdi uzartý týraly tujyrymdamalyq sheshim qabyldandy. Budan basqa, zań jobasynda jerdi paıdalaný men qorǵaýdy memlekettik baqylaý kúsheıtiledi, aýyl sharýashylyǵy maqsatyndaǵy jerlerge satyp alynbaǵan jer paıdalaný quqyǵyn ıelikten shyǵarý múmkindigi kózdeledi, jergilikti halyqtyń muqtajy úshin jaıylymdyq jerlerdiń aýmaǵy aıqyndalady, sondaı-aq jer zańnamasyn odan ári jetildirýge baǵyttalǵan basqa da normalar engiziledi», - dedi depýtat Berik Ospanov zań jobasyn talqylaý kezinde.
Zań jobasyn Palata bıylǵy 2 maýsymda birinshi oqylymda maquldady.
Depýtattar engizgen túzetýlerdiń basym bóligi jobanyń negizgi maqsattarymen baılanysty, redaktsııalyq-naqtylaý sıpatqa ıe jáne zań tehnıkasy qaǵıdalaryna, Qazaqstan Respýblıkasynyń qoldanystaǵy zańnamasyna sáıkes keltirýge baǵyttalǵan.
Osylaısha, birqatar ózgerister aýyl sharýashylyǵy maqsatyndaǵy jerlerde jer paıdalaný quqyǵyn ıelikten shyǵarýǵa qatysty: tıisti ýákiletti organdarǵa jalǵa berý sharttaryn qaıta resimdeý jónindegi quzyret beriledi; jaldaý quqyǵy shart talaptarynyń ózgeristeri onyń tarabyn (jańa jer paıdalanýshyny) naqtylaý bóliginde tirkelgen kezden bastap týyndaıtyny aıqyndaldy; jer paıdalaný shartynyń ataýy naqtylandy.
«Budan basqa, jer ýchaskesiniń nysanaly maqsatyna qaraı (qurylys salý úshin jáne aýyl sharýashylyǵy óndirisi úshin berilgen) jer ýchaskesin maqsaty boıynsha paıdalanbaý kezeńderiniń arajigi ajyratyldy. Jer komıssııasynyń hattamalyq sheshimine shaǵym jasaý rásimin naqtylaý maqsatynda osy sheshimge 2021 jylǵy 1 shildeden bastap kúshine enetin Qazaqstan Respýblıkasynyń Ákimshilik rásimdik-protsestik kodeksinde kózdelgen tártippen sotqa shaǵym jasalýy múmkin dep aıqyndalǵan. Zań jobasymen engiziletin túzetýlermen úılestirý úshin Sý kodeksine jáne «Ruqsattar jáne habarlamalar týraly» Zańǵa ózgerister de kózdelip otyr. Májilistiń barlyq komıteti osy zań jobasy boıynsha oń qorytyndylaryn berdi. Múddeli ýákiletti organdar, saıası partııalar, saraptamalyq qoǵamdastyq ókilderiniń qatysýymen jumys tobynyń 7 otyrysy jáne Bas komıtettiń 2 keńeıtilgen otyrysy ótkizildi», - dedi Berik Ospanov.
