Májilis jer ýchaskelerin berý protsesin tsıfrlandyrý týraly zań jobasyn maquldady
Búgin Májiliste «Qazaqstan Respýblıkasynyń keıbir zańnamalyq aktilerine jyljymaıtyn múliktiń biryńǵaı memlekettik kadastry sheńberinde memlekettik kórsetiletin qyzmetterdi tsıfrlandyrý máseleleri boıynsha ózgerister men tolyqtyrýlar engizý týraly» Qazaqstan Respýblıkasy zańynyń jobasy qaraldy.
«Búginde jer úshin6 ol jerdegi jyljymaıtyn múlik úshin bólek memlekettik akt beriledi. Endigi ýaqytta ekeýi biriktirilip bir ǵana memlekettik akt bolady. Atalǵan jańashyldyq júıeni, salany damytý úshin qabyldanyp otyr. Óıtkeni halyqaralyq tájirıbe boıynsha jer men jyljymaıtyn múlik birge júredi. Mysaly, Nıderland, Ońtústik Koreıa jáne kóptegen elderde kadastrlyq tólqujat árdaıym jer jáne jyljymaıtyn múlikpen birge bolady. Meniń oıymsha, kadastrlardy biriktirý tıimdi. Sondaı-aq azamattar úshin quqyqtyq jáne jer kadastry týraly, qoǵamdyq kadastrlyq kartadaǵy jyljymaıtyn múlik obektileri týraly aqparattyń ashyqtyǵy men qoljetimdiligin qamtamasyz etedi», - dedi QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Áset Turysov Májilis otyrysynda.
Vıtse-mınıstrdiń málimdeýinshe, jańa memlekettik kadastrlyq karta arqyly bos jer ýchaskeleri týraly aqparat alýǵa bolady.
«Osy kartada ózińizge unaǵan jer ýchaskesin tańdap, zańnamaǵa sáıkes bul jerdi aýktsıonǵa shyǵarý úshin ótinim berýge bastamashylyq jasaı alasyz. Sodan soń «Elektrondy úkimettegi» jeke kabınetińizge habarlama keledi. Osylaısha bos jer ýchaskelerin alý boıynsha ashyqtyq pen qoljetimdilik arta túsedi», - deıdi ol.
Májilis depýtaty Aıqyn Qońyrov atalǵan zań jobasyna birqatar túzetý engizilgeni týraly aıtty.
«Úkimet jer berý tártibi eki jolmen retteledi dep boljady. ıAǵnı elektrondy formatta jáne saýda-sattyq arqyly. Alaıda el aýmaǵy ınternetpen tolyq qamtylmaǵandyqtan, jumys toby elordanyń, respýblıkalyq, oblystyq jáne aýdandyq mańyzy bar qalalardyń jerleri úshin ǵana jer ýchaskelerine quqyq berýdiń elektrondy formatyn engizý týraly sheshim qabyldady. Bul «Elektrondy úkimettiń» veb-portaly arqyly jarııa kadastrlyq karta arqyly júzege asyrylady», - dedi Aıqyn Qońyrov.
Onyń aıtýynsha, jer ýchaskesine quqyq berý protsesterin avtomattandyrýǵa baılanysty jer komıssııasynyń ınstıtýty, sondaı-aq joǵaryda atalǵan aýmaqtarda jer-kadastrlyq josparyn ázirleý jáne bekitý alynyp tastalady.
«Bul tıisti ótinishterdi qaraý merzimin edáýir qysqartady. Osyndaı tetik eldi mekenderde ornalasqan jer ýchaskeleriniń nysanaly maqsaty ózgergen kezde de qoldanylady. Sonymen qatar jer ýchaskesi men ǵımaratqa qatysty qujat sany azaıady. Osylaısha jer aktisi men tehpasport jyljymaıtyn múlik obektisiniń kadastrlyq pasporty túrinde bir qujatqa biriktiriledi», - deıdi ol.
