Májilis jer qoınaýyn paıdalaný týraly qujatqa Senat engizgen ózgeristermen kelisti
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jer qoınaýyn paıdalaný máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristerge kelisimin berdi. Osylaısha, Parlament atalǵan qujatty qabyldady. Endi zań Memleket basshysynyń qol qoıýyna joldanady.
Qujatty qabyldaý memlekettik organdardyń sheshimder qabyldaýynyń ashyqtyǵyn qamtamasyz etýge, bızneske quqyqqa orynsyz aralasýshylyq múmkindigin boldyrmaýǵa, jer qoınaýy salasynda barlyq deńgeıdegi ákimshilik kedergilerdi alyp tastaýǵa yqpal etetin bolady. Engiziletin ózgerister tikeleı sheteldik ınvestıtsııalardyń kelýine jáne geologııalyq-barlaý salasynda kásipkerlikti damytýǵa ári jańa jumys oryndaryn qurýǵa múmkindik beredi dep kútilýde.
Senat zań jobasyna ákimshilik aıyppul týraly uǵymǵa ózgerister engizýge baılanysty zań jobasyna qosymsha tarmaq engizgen edi. Sonymen qatar, jer qoınaýyn paıdalaný boıynsha operatsııalardy júrgizýge negiz bolatyn saraptamalardyń túrlerin anyqtaý týraly túzetý jasalǵan. Budan bólek, osy saladaǵy ortalyq memlekettik organnyń fýnktsııasy naqtylandy. Tutastaı alǵanda, Parlament qabyldaǵan zań boıynsha Jer jáne Ekologııalyq kodeksterine, Salyq kodeksine, «Jer qoınaýy jáne jer qoınaýyn paıdalaný týraly», «Magıstraldy qubyr týraly» zańdarǵa ózgerister men tolyqtyrýlar engizilip otyr.
