Májilis Jer kodeksine engizilgen ózgeristerdi ekinshi oqylymda maquldady
ASTANA. 2 naýryz. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR Jer kodeksine ózgerister men tolyqtyrýlar engizý týraly» zań jobasyn ekinshi oqylym boıynsha maquldady.
Atalǵan zań jobasy «Nur Otan» HDP janyndaǵy Sybaılas jemqorlyqqa qarsy kúres jónindegi respýblıkalyq qoǵamdyq keńestiń sheshimderin jáne partııanyń Májilistegi fraktsııasynyń tapsyrmalaryn oryndaý maqsatynda ázirlenip, depýtattar tarapynan bastamashylyq jasalǵan bolatyn. Sondaı-aq, qujatty ázirleý negizinen jer resýrstaryn bólý jáne paıdalaný máselelerin zerdeleý maqsatynan týyndaǵan bolyp tabylady. Zań jobasynda azamattar men tulǵalardyń jer ýchaskelerin berý týraly ótinishterin qaraý merzimderi men tártibin saqtamaý, kezektilikti buzý jáne quqyqqa qaıshy burmalaý, eldi mekenderdiń Bas josparlaryn saqtamaý arqyly zańdy buzýdyń aldyn alýǵa baǵyttalady. Bundaı anyqtalǵan zań buzýshylyqtardy bastamashy depýtattar sybaılas jemqorlyq kórinisterimen baılanystyrady. Osy maqsatta birqatar normalar qamtylyp otyr.
Ekinshi oqylymǵa ázirleý barysynda depýtattar tarapynan 52 eskertý men usynystar túsken. Atap aıtar bolsaq, jerdi rezervte qaldyrýǵa baılanysty qatynastardy quqyqtyq retteýdegi olqylyqtardy joıý maqsatynda Jer kodeksi jańa bappen tolyǵyp otyr. Onda jerdi rezervte qaldyrýdyń negizderi, tártibi men merzimderi aıqyldalyp, jergilikti atqarýshy organnyń quzyreti naqtylanady. Budan bólek, naryqtyq tetikter eskerilip, eldi mekenderdiń aýmaqtaryn baǵalaı otyryp, aımaqtarǵa bólý máseleleri retke keltirilgen. Bul rette jer ýchaskelerin jeke menshikke berý kezinde olar úshin tólemaqynyń bazalyq stavkalaryn belgileý máseleleri jergilikti ókildi jáne atqarýshy organdardyń quzyretine jatqyzylady.
Sonymen qatar, depýtattar avtomobılderdiń, jan basyna shaqqanda jeńil avtomobılder sanynyń kúnnen kúnge artyp kele jatqandyǵyn, jalpy avtokólik quraldarynyń trafıgin, ásirese Almaty qalasynyń ortalyq, isker jáne kommertsııalyq bólikterine avtokólikterdi ýaqytsha ornalastyrý problemalarynyń shıelenisip otyrǵanyn eskere kele, belgilengen ortaq paıdalanýǵa jerlerden avtoturaqqa arnap jer ýchaskelerin berý máselelerin retteıtin normalardy engizdi.
Májilis maquldaǵan zań jobasy Parlament Senatyna jiberiledi.
