Májilis jeke sot oryndaýshylaryna qatysty qujatty maquldady
NUR-SULTAN. QazAqparat - Parlament Májilisiniń jalpy otyrysynda «Qazaqstan Respýblıkasynyń atqarýshylyq is júrgizý máseleleri boıynsha keıbir zańnamalyq aktilerine ózgertýler men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
«Elbasy Nursultan Nazarbaev «100 naqty qadam» - Ult josparynyń 27 qadamynda jeke sot oryndaýshylary ınstıtýtyn damytyp, memlekettik sot oryndaýshylaryn birtindep qysqartýdy tapsyrdy. Usynylyp otyrǵan zań jobasy osy tapsyrma boıynsha qabyldanǵan sharalardy ári qaraı jetildirý maqsatynda ázirlendi. Ony daıyndaý barysynda jeke sot sheshimderin oryndaý tájirıbesi zerdelenip, zańnamadaǵy olqylyqtar eskerildi. Sonymen qatar, Ekonomıkalyq yntymaqtastyq jáne damý uıymy men TMD elderi tájirıbesi qarastyryldy», - dedi Májilis depýtaty Asylbek Smaǵulov zań jobasyn tanystyrý barysynda.
Onyń paıymynsha, jalpy atqarýshylyq is júrgizý sapaly bolsa, azamattardyń sotqa degen senimi de artady.
«Árıne, bul salada problemalar bar. Olar depýtattardyń qatysýymen ótken sharalarda keńinen talqylandy. Negizgi problemalarǵa toqtalsaq, shalǵaı eldi mekender jeke sot oryndaýshysymen tolyqtaı qamtylmaǵan. Ekinshiden, atqarýshylyq is júrgizý satysynda azamattardyń quqyqtary osal qorǵalǵan. Úshinshiden, jeke sot oryndaýshylaryn baqylaý, olardy zań buzýshylyqtary úshin jaýapkershilikke tartý sharalary jetilmegen», - dedi depýtat.
Atalǵan zań jobasynyń maqsaty - barlyq taraptardyń múddelerin eskere otyryp, atqarý qujattaryn sapaly ári ýaqtyly oryndaýdy qamtamasyz etý.
Zań jobasyn qabyldaý mynandaı mindetterdi sheshýge múmkindik beredi: jeke sot oryndaýshylarynyń qyzmetin jetildirý jáne atqarýshylyq is júrgizýdiń tıimdiligin, ıaǵnı sot oryndaýshysy qabyldaıtyn protsestik qujattardy, áreketterdi ońtaılandyrý arqyly arttyrý; jeke sot oryndaýshylarynyń tártiptik praktıkasyn jetildirý; memlekettik eńbek ınspektorlary jumys berýshilerdiń jalaqy tólemeý máseleleri boıynsha bergen uıǵarymdardyń tıimdi oryndalýyn qamtamasyz etý.
