Májilis jeke basty kýálandyratyn qujattar máselesi boıynsha Senatqa kelisim berdi
ASTANA. 9 qańtar. QazAqparat - Búgin QR Parlamenti Májilisiniń jalpy otyrysynda palata depýtattary
«Qazaqstan Respýblıkasynyń keıbir zańnamalyq aktilerine jeke basty kýálandyratyn qujattar týraly» zań jobasyna Senat engizgen ózgeristerge kelisimin berdi.
Atalǵan zań jobasy «Jeke basty kýálandyratyn qujattar týraly» negizgi Zańǵa ilespe qujat bolyp tabylady.
Bul zań jobasynyń basty jańalyǵy bosqynnyń eńbek etý erkindigi quqyǵyn eskere otyryp, jumysshyda bosqyn kýáligi bolǵan kezde eńbek shartyn jasasýǵa múmkindik beriletin túzetýlerdi qarastyrady. Sonymen qatar, bala asyrap alý qupııasyn qamtamasyz etý maqsatynda ýákiletti organǵa jańa jeke sáıkestendirý nómirin qalyptastyrý quqyǵy berilip otyr.
Senatta talqylaý barysynda zań jobasyna birqatar túzetýler engizilgen bolatyn. Atap aıtqanda, senatorlar «Balaly otbasylarǵa beriletin memlekettik járdemaqylar týraly» jáne «Jeke kásipkerlik týraly» zań normalarynan azamattardy tirkeý kitabyn alyp tastaý týraly ózgeris engizgen. Budan bólek, «Sáıkestendirý nómirleriniń ulttyq tizilimderi týraly» zańdaǵy jeke sáıkestendirý nómiri bar qujattar tizbesinen bosqyn kýáligin alyp tastaý usynylǵan. Májilis atalǵan túzetýlerge kelisimin berdi.
