Májilis «Jaıylymdar týraly» zań jobasyn óndiriske aldy
ASTANA. QazAqparat - Búgin Parlament Májilisiniń jalpy otyrysynda palata depýtattary «Jaıylymdar týraly» jáne «Qazaqstan Respýblıkasynyń keıbir zańnamalyq aktilerine jaıylymdar máseleleri boıynsha ózgerister men tolyqtyrýlar engizý týraly» zań jobalaryn óndiriske aldy.
Zań jobasy Memleket basshysynyń Joldaýynda júktelgen tapsyrmalardy oryndaý maqsatynda ázirlengen. Elbasy «Qazaqstan2050 Strategııasy: Qalyptasqan memlekettiń jańa saıası baǵyty» atty Joldaýynda otandyq mal sharýashlyǵyn dástúrli túrde júrgizý úshin jańa ǵylymı-tehnologııalyq basqarýshylyq jetistikterdi eskere otyryp, shalǵaıdaǵy mal sharýashylyǵyn damytý men qaıta jańǵyrtýdy tapsyrǵan bolatyn.
«100 naqty qadam» Ult Josparynyń 35-i jáne 97-i qadamdarynda osy baǵytta mindetter júktelgen. Al zań jobasyn qabyldaý aýyl sharýashylyǵyndaǵy jerlerdi keshendi paıdalanýǵa, eldi mekenderdiń aýmaǵyndaǵy jaıylym jerlerdiń jaǵdaıyn jaqsartýǵa baǵyttalady. Budan bólek, jaıylymdardyń tozý protsessteriniń aldyn alý, turaqty jem-shóp bazasyn qurý úshin, tabıǵı jaıylymdyq alqaptardyń áleýetin arttyrý máseleleri qamtylatyn bolady. Ekologııalyq taza mal sharýashylyǵy ónimderin ulǵaıtyp, jergilikti mańyzdy máselelerdi sheshýdegi ózin-ózi basqarýǵa jaǵdaı jasaý sharalary da kózdelip otyr», dedi Májilistiń Agrarlyq máseleler komıtetiniń tóraǵasy Saparhan Omarov.
Zań jobasyna Úkimettiń oń qorytyndysy men basqa da saraptamalar alynǵan. Aldaǵy ýaqytta depýtattar osy zań jobasyn jumys toptarynda keńinen talqylaýǵa kirispek.
