Májilis jáne máslıxat depýtattyǵyna úmitkerlerdiń úgit-nasıxat jumystaryn ótkizý merzimderi belgilendi

ASTANA. QazAqparat - Partııalyq tizim boıynsha QR Parlamenti Májilisiniń depýtattyǵyna saılanatyn úmitkerlerdiń úgit-nasıxat naýqany 2016 jylǵy 20 aqpan kúni bastaý alady. Bul týraly búgin Ortalyq saılaý komıssııasy tóraǵasy Qýandyq Turǵanqulov málim etti.

«Biz bekitken kúntizbelik josparda, partııalyq tizim boıynsha QR Parlamenti Májilisiniń depýtattyǵyna saılanatyn úmitkerlerdiń úgit-nasıxat naýqany 2016 jylǵy 20 aqpan kúninen bastaý alyp, 18 naýryzda saǵat 24:00-ge deıin jalǵasady. QHA boıynsha QR Parlamenti Májilisiniń depýtattyǵyna saılanatyn úmitkerlerdiń úgit-nasıxat naýqany 2016 jyldyń 6-19 naýryz aralyǵynda ótedi. Máslıxat depýtattyǵyna úmitkerlerdiń saılaýaldy úgit-nasıxaty 24 aqpanda bastalady jáne 18 naýryzda saǵat 24:00-de aıaqtalady», - dedi ol.

Onyń aıtýynsha, saılaý birlesip uıymdastyrylǵandyqtan, saılaýshylarǵa birden úsh saılaý bıýlletenderi beriledi. «Biri saıası partııaǵa daýys berý úshin, ekinshisi - oblystyq jáne Astana men Almaty qalalyq máslıxat depýtattaryn saılaýǵa, úshinshisi aýdandyq nemese qalalyq máslıxat depýtattaryn saılaýǵa beriledi. Astana jáne Almaty qalalarynda aýdandyq máslıhattar joq. Sondyqtan turǵyndar tek eki bıýlleten alady», - dep atap ótti komıssııa tóraǵasy.

Jalpy Parlament Májilisine 107 depýtat saılanady. Onyń ishinde 98 depýtat partııalyq tizim boıynsha, 9-y Qazaqstan xalqy Assambleıasy atynan saılanbaq. Al jergilikti máslıxatqa 3335 depýtat saılanady. Onyń ishinde oblystyq máslıxattarǵa - 550, qalalyq - 625, sondaı-aq 2160 depýtat aýdandyq deńgeılerde saılanady.

Aıta keteıik, QR Parlament Májilisiniń jáne máslıxat depýtattaryn saılaý 20 naýryzǵa, QHA atynan usynylatyn depýtattardyń saılaýy 21 naýryzǵa belgilendi.