Májilis jáne máslıhattar saılaýynda túrli-tústi birneshe bıýlleten beriledi

ASTANA. QazAqparat – 19 naýryz kúni respýblıkalyq mańyzdaǵy eki qala men Astanada saılaýshylarǵa – 4 túrli, qalǵan óńirler 5 túrli bıýlleten beriledi, dep habarlaıdy QazAqparat.

19 naýryzda ótetin Májilis jáne máslıhattar depýtattaryn saılaýda daýys berý alǵash ret jańa erejeler boıynsha ótedi – depýtattar aralas júıe boıynsha saılanady.

Sonymen, respýblıkalyq mańyzy Almaty jáne Shymkent qalalary men Astana qalasynda elektorat tek partııa úshin ǵana emes, táýelsiz kandıdattar úshin de daýys beredi. Olarǵa túrli-tústi bıýlletenderdiń 4 túri beriledi.

Blankiler ár túrli túste bolady:

1. Májilis depýtattaryn partııalyq tizimder boıynsha saılaý bıýlleteni – kókshil (7 partııa ataýy jazylǵan);

2. Májilis depýtattaryn birmandattyq aýmaqtyq saılaý okrýgi boıynsha daýys berý bıýlleteni – jasyl (kandıdattardyń aty-jóni kórsetilgen);

3. Qala máslıhatyna partııalyq tizimder boıynsha saılaý bıýlleteni – kúlgin (7 partııanyń tizimi kórsetilgen)

4. Qala máslıhatyna birmandattyq aýmaqtyq saılaý okrýgi boıynsha saılanatyn kandıdatqa daýys berý bıýlleteni – qyzǵylt sary (kandıdattardyń aty-jóni jazylǵan).

Barlyq bıýlletende «Barlyǵyna qarsymyn» degen baǵan da bolatynyn aıta keteıik.

Al qalǵan 17 oblysta daýys berýshiler 5 túrli saılaý bıýlletenin alady.

Blankilerdiń túri:

1. Májilis depýtattaryn partııalyq tizimder boıynsha saılaý bıýlleteni – kókshil (7 partııa ataýy jazylǵan);

2. Májilis depýtattaryn birmandattyq aýmaqtyq saılaý okrýgi boıynsha daýys berý bıýlleteni – jasyl (kandıdattardyń aty-jóni kórsetilgen);

3. Oblys máslıhatyna partııalyq tizimder boıynsha saılaý bıýlleteni – kúlgin (7 partııanyń tizimi kórsetilgen)

4. Oblys máslıhatyna birmandattyq aýmaqtyq saılaý okrýgi boıynsha saılanatyn kandıdatqa daýys berý bıýlleteni – qyzǵylt sary (kandıdattardyń aty-jóni jazylǵan).

5. Máslıhatqa (qalalyq nemese aýdandyq) birmandattyq aýmaqtyq saılaý okrýgi boıynsha saılanatyn kandıdatqa daýys berý bıýlleteni – sur tústi (kandıdattardyń aty-jóni jazylǵan).

Barlyq bıýlletende «Barlyǵyna qarsymyn» degen baǵan bolady.

Eske salsaq, Ortalyq saılaý komıssııasynyń málimetinshe, daýys berýshiler tiziminde 12 032 550 adam bar.