Májilis zeınetaqymen qamsyzdandyrý týraly zań jobasyn qaraıdy
ASTANA. 16 sáýir. QazAqparat - Erteń 17 sáýirde Parlament Májilisiniń jalpy otyrysy ótetin bolady. Onda palatanyń qaraýyna birqatar máseleler shyǵarylyp otyr. Bul týraly Májilistiń baspasóz qyzmetinen habarlandy.
Atap aıtqanda, palata depýtattary «Qazaqstan Respýblıkasynyń keıbir zańnamalyq aktilerine jetim balalar men ata-anasynyń qamqorlyǵynsyz qalǵan balalardyń turǵyn úıge quqyqtaryn qamtamasyz etý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylaıtyn bolady. Budan bólek, májilismender talqysyna «Qazaqstan Respýblıkasynda zeınetaqymen qamsyzdandyrý týraly» zań jobasy birinshi oqylymda usynylady. Atalǵan qujat boıynsha Eńbek jáne halyqty áleýmettik qorǵaý mınıstri Serik Ábdenov baıandaıdy dep kútilýde. Al qosymsha baıandamany Májilis depýtaty Nurtaı Sábılıanov jasaıtyn bolady.
Sonymen qatar, kún tártibindegi «Qazaqstan Respýblıkasynyń keıbir zańnamalyq aktilerine Keden odaǵynda tarıftik emes retteý sharalaryn qoldaný máseleleri boıynsha ózgerister men tolyqtyrýlar engizý týraly» zań jobasy boıynsha Ekonomıka jáne bıýdjettik josparlaý mınıstri Erbolat Dosaev baıandama jasaıtyny kútiledi.
